Mumbai, Jymmang 23 : Ka Mumbai City FC ha ka sngi Ba ar ka la pynbna ba rangïalehkai na Spain uba dei ruh u midfielder u Alberto Noguera u la soi pynjlan biang ïa ka kontrak bad ka club haduh kaba kut jong ka samoi 2023-24.
U Alberto Noguera uba la 33 snem ka karta u la ïalehkai bha na ka bynta ka Mumbai City kaba la kiew shaphrang ha ka samoi kaba dang shu dep, ha kaba katei ka kynhun ka la long ka nongjop ïa ka League Shield jong ka Indian Super League (ISL) 2022-23.
Ym tang ba utei u rangïalehkai ka Spain u la ïalehkai bha na ka bynta ka Mumbai City FC hynrei u la ïoh ruh ban thep ïa ki saw kol kiba kongsan tam ha ka jingïalehkai pyrshah ïa ka Hyderabad FC, Chennayin FC, FC Goa bad pyrshah ïa ka Odisha FC, bad u la ïarap ruh ïa ka kynhun da kaba ïoh knieh bol 55 sien bad ïoh ban kyrda na ka jingshah thep kol 15 sien.
Utei u midfielder u la mih madan nyngkong na ka bynta ka Islanders da kaba thep ïa ka kol ha ka jingjop da 3-1 pyrshah ïa ka Jamshedpur FC ha ka Club Playoffs, bad ïarap ïa ka Mumbai City FC ban ïoh rung sha ka Group Stage jong ka 2023-24 AFC Champions League.
“Ban don biang ha ka Mumbai City kadei ka rai kaba biang tam na ka bynta jong nga. Nga la ïoh ban ïalehkmen ïa ka por jong nga hangne, bad ngi ïoh ka samoi kaba biang bha ha ka samoi ba lah dep. Ban ïarap thaw history ïa ka club, kadei ka khyllipmat kaba sngew sarong na ka bynta jong nga bad ki nongkyrshan ki la pynkmen ïanga ba nga long kum shi ïing shi sem. Ngi dang sa kynduh shibun ki jinhïalehkai nangne shakhmat, khamtam ba ngin ïoh ban bat biang ïa ka nam lahduh bad nga long ba la kloi ban ïarap ïa ka Club ba kan nang ïoh shuh shuh ka jingjop,” ong u Noguera.
U Noguera uba la kha ha Madrid, u la kiew bha ka kyrdan na ka Getafe CF shuwa ba un sdang ka jingïaid lynti ha ka jingïalehkai professional na ka Rayo Vallecano. Utei u midfielder u la mih madan ha ka kyrdan ki senior na ka Atletico Madrid ha ka La Liga bad u la ïoh ban leit ïalehkai ïa shibun ki club ha ka Segunda bad Tercera division ha Spain.
U Noguera u la mihkhmat ïa ka Blackpool FC ha England bad Baku FC ha Azerbaijan ruh kumjuh. Shuwa ba un poi ha Mumbai City FC, u Noguera u la mihkhmat ïa ka FC Goa ha ki ar samoi kata ha ka 2021-22.
“Ngi dap da ka jingkmen ba u Alberto u la jied ban pynjlan biang ïa ka kontrak bad ngi sa shi samoi. Ka jingtbit bad ka jinglah jong u ban ïalehkai bha kadei kaba hakhmat eh ka jingkiew shaphrang jong ngi ha ka samoi ba lah dep. Ka jingsngewthuh jong u shaphang ka jingïalehkai bad ka jinglah ha ka rukom bat bol ka pynlong ïa kiwei ki player ba ki kwah ba un ïalehkai biang bad ka kynhun,” ong u Des Buckingham, uba dei u head coach jong ka Mumbai City FC.
