Thaw Histori u Bah Gabriel Wahlang, ka sien nyngkong ban jop ka Congress ha Nongstoiñ Constituency

Nongstoiñ, Lber 2: Lyngba ki 13847 ngut ki nongkyrshan u Bah Gabriel Wahlang u la long u MLA ba nyngkong eh ba ka party Congress kan sei ha ki phew tylli ki snem jong ka jingïaleh elekshon.
Lehse kan long ha ka khana sah kynmaw na ka bynta ka party hi baroh kawei, namar hadien ba u la jop ïa ka elekshon MDC, mynta pat u la jop don burom pat sa ha ka elekshon MLA sha ïing dorbar thaw aiñ ka Jylla.
Kumba beh ka lyer bad ka sur na kiba bun balang ha kine ki bnai bad ki por ba la leit, u Bah Gabriel Wahlang mynta ka kynti u la lah ban pynliem noh toiñ ïa u Bah Mac Millan Byrsat sitting MLA na ka NPP da 2624 vote, namar na ka liang u bah Mac Millan u la ïoh 11223 vote.
Lehse kan dei ruh ka sien ba nyngkong ba ka jingkylla vote kan shim por haduh ka por 3 baje ei ei janmiet na Nongstoiñ Constituency. Hynrei, haba kheiñ kyllum lang ïa ki vote na ki EVM bad ki postal ballot, u Bah Gabriel Wahlang u la khur ïa ka jingjop bad long mynta u nongmihkhmat ba la jied tylli khnang da ki paidbah.
Haba kren sha ki lad pathai khubor hadien ba u la shimti ïa ka kam kum u MLA, u Bah Gabriel Wahlang u la ong, “Nga ai nguh ïa u Blei trai kynrad u ba la plie ïa kane ka lad ka lynti ba ngan poi sha kane ka thong. Ka jingkhublei ka long kyrpang sha ki nongkitkam ka party kiba la trei shitrhem met bad mynsiem miet la bad sngi. Nga ai khublei kyrpang ruh ïa ki paidbah baieit jong nga, kiba la kyrshan bad don bynta lang ha kaba ai ïa kane ka jingjop don burom”.
U la ong ruh, “Kumba nga la ju kren ha ki rynsan bapher bapher, ka thong kaba hakhmat ka long ban don ka jingïadei kaba ïa jan bad ki paidbah. Ngan pyrshang katba lah ban ai ka jingshakri kaba bha sha baroh, da kaba ngan wanrah ïa ki thong kiba nga lah don, kata la ka long ha ka roi ka par, ka ïoh kam ïoh jam, ka rep ka riang, ka jingnang jingstad bad kiwei kiwei kiba I donkam”.
“Kaei kaba donkam nangne shakhmat ka long ban ïatreilang ryngkat bad ki paidbah, la ka long ha ka khia ka shon ka sngewsih ne sngewbha bad ban ai ïa kata ka jingshakri kaba ai jinghun sha ki paidbah jong ka Constituency hi baroh kawei kumba baroh ki angnud ïa kata”, u la ong.
Kane ka jingjop jong u Bah Gabriel Wahlang ka long ka bym shym la poi pyrkhat satia namarba u kyrtong ka NPP u Bah Macmillan Byrsat u la kop ba u la trei bha baroh san snem ban wanrah ia ki song pynroi hapoh ka Nongstoiñ Constituency.
Ka jingjop jong u Bah Gabriel ka jingkyrkhu ia ki paidbah ka Nongstoiñ.