Khliehriat, Lber 2 : U bah Kyrmen Shylla, u kyrtong ka United Democratic Party, uba na ka shnong Byndihati, uba la ju long mynshwa kum u myntri ka sorkar jylla, ha kane ka kynti ruh u la jop donburom biang ha kane ka Meghalaya Legislative Assembly Election 2023, na ka 6 Khliehriat Constituency, ha kaba u la ïoh haduh 23514 vote, u tam haduh 5606 ki vote ïa u kyrtong ba ïaleh pyrshah, u bah Nehlang Lyngdoh, jong ka party NPP uba la ïoh 17908 ki vote, kumba u la dep ong, ba um artatien eiei ban ïoh ïa ka jingjop namar ki paidbah jong ka constituency hi ki dang ieid bad shaniah ïa u kum u nongmihkhmat.
“Sngewkmen ban ong ba ha ka jingïaleh, nga ïoh ban ïakhun lang bad kiwei kiwei ki kyrtong, ha ka jingïaleh ngi don la ka jong ka jong ka jingthmu, ka jingkyrmen, hynrei ha kaba kut kane ka dei hi ka lad ba u paidbah u ai biang ka lad ïa nga bad na ka liang jong nga , nga kular ba ngan ïai trei shitom katba lah na ka bynta ka bha ka miat jong ka constituency bad nga khot bad wer lang ïa kine kiwei ki kyrtong kiba ïaleh pyrshah ha kane ka election ba kin sngewbha ban pyni lem ïa ki lynti namar ha ka jingïaid lynti jong ki ruh, ki don la ki jong ki jingthmu kiba bha jong ki, nga ngeit skhem ba da ka jingïa don ryngkat lang bad ki , kumjuh ruh bad kito kiba kyrshan bad kito ki ba khlem kyrshan ruh ngeit skhem ba ka bha ka miat kan wan ha kane ka constituency jong ngi” ong u bah Kyrmen Shylla.
U la bynrap ruh ba “Haba ïoh kum kane ka jingjop, kane ka pyni shynna ïa ka jingtreishitom ki nongkitkam kiba ha ka 6 khliehriat constituency, ha baroh kine ki sngi, ha kaba ki la duh thiah, duh dem, te kane ka jingieid jong ki paidbah kan nang iaineh bad ïai skhem ha baroh ki por”
U don ruh ka jingkyrmen ba da ka jingtreilang sa ha kine ki san snem ki ba dang wan, ka constituency ka dang ïai kiew shuh shuh.
U bah Kyrmen Shylla, naduh ki por ba la leit ruh, u la ju pynpaw ba u dang don ka jingkyrmen ban jop, namar ba u dang don ka jingïatreilang bad ki paidbah, kumjuh ruh bad ki nongïalam ka party na East Jaiñtia Hills District, kumjuh ruh u ju pynpaw ba ki paidbah ki dang don ka jingieid bad jingshaniah ha u bad kane ka la urlong shisha ha kaba u la ioh ïa ka jingjop donburom ha kane ka kynti ruh.
Ki kyrtong kiba la ïakhun na ka 6-Khliehriat Constituency, kiba khlem poi sha ka thong, ki kynthup u bah Nehlang Lyngdoh, na ka party NPP, uba la ïoh 17908 ki vote, u bah Damewanhi Rymbai, na ka party VPP, uba la ïoh 861 vote, u bah Bhayes Chyrmang na ka party BJP, uba la ïoh tang 174, u bah Sunida Bareh , na ka TMC uba la ïoh 109 vote bad i kong jhanika siangshai, na ka party Congress, iba la ïoh 114 vote bad ki 115 tylli ki vote ki dei ki NOTA.
