Haduh 6286 jop kput ka HSPDP ïa ka NPP ha Mawshynrut Constituency

Nongstoiñ, Lber 2: U kyrtong ka HSPDP Mawshynrut Bah Methodios Dkharu la jop kput haduh 6286 vote pyrshah ïa u bah Gigur Myrthong sitting MLA jong ka NPP. Ha ka jingïakhun hapdeng kine ar kaba la shongshit bha naduh kine ki bnai bad ki por ba la leit, ka jubab ba ki paidbah ka Mawshynrut hi ki la ai ka long haduh 19368 vote sha u Bah Methodios Dkhar.
Toi watla ka lyer ka beh bha naduh kine ki bnai ba la dep naduh ba ai tiket ka HSPDP sha u Bah Methodios, hynrei u Bah Gigur Myrthong u dang khur pat haduh 13082 vote. Haba shu peit ïa ka jingshah rem kaba long haduh 6286 vote, ka pynpaw shai ba ki paidbah hi ki la ngiah la kdang ïa u sitting MLA bad ki da kwah eh ban don noh da uwei u nongmihkhmat ban ïalam na ka bynta jong ki ha kine ki san snem ban wan.
Na ka liang u Bah Methodios Dkhar haba kren sha ki lad pathai khubor hadien ba u la shimti ïa ka kam kum u MLA ba thymmai na Mawshynrut Constituency, u la ong, “Nga ai khublei kaba kyrpang eh sha baroh ki nongkyrshan bad ki nongtrei bad ki nongïalam jong ka Mawshynrut Constituency, kiba la trei shitrhem naduh ba sdang bad ïaishah ruh ïa ki jingeh kiba bun haduh ban da kheit ïa une u soh jingjop ba don burom”.
“Haba ngi la jop ngin nang ïai trei bad ïai pynbha ïa kiei kiba ki MLA barim ki la leh bad ban wanrah shuh shuh ïa ki kam pynroi bad ki jingkylla ki ban long ka jingmyntoi ïa ka dong ka thaiñ baroh kawei. Namar ka Mawshynrut shisha hi ka dang donkam shibun ki jingkylla namar ngi dang sahdien palat ha baroh ki liang, la ka long ha ka liang ka koit ka khiah, ka pule puthi bad bun bah kiwei pat”, u la ong bad bynrap, “Kaei kaba ki paidbah Mawshynrut ki angnud kata hi ruh ka dei ka jingangnud jong nga bad ïa kata hi ngan leh”, u la ong.