Mawkyrwat, Lber, 02: U bah Pius Marweiñ na ka 35 – Ranikor Constituency bad u bah Renikton Lyngdoh Tongkhar ki la long ki ar ngut ki nongmihkhmat na ka United Democratic Party (UDP) kiba la poi sha ka thong jong ka jingjop hadien ba la dep ban pyntip ïa ka jingïoh jong ki ïa ki jingñiew ïa ki vote hapoh ka Multipurpose Hall jong ka DC’s office, Laitlawsang, South West Khasi Hills District.
Haba phai ha ka jingïoh ïa ki vote kaba dei hapoh ka 35 – Ranikor ka long u bah Pius Marweiñ u la jop da 16502 u la jop pyrshah ïa u Martin M. Danggo na ka BJP da 5649 vote namar ka jingïoh vote jong u ka long 10853, u bah Mighter Marweiñ u kyrtong shimet 3055.
Katba ha ka 36 – Mawkyrwat Constituency pat u bah Renikton Lyngdoh Tongkhar u la jop da 10678 bad tam ïa u bah Carness Sohshang na ka INC da 1272 vote uba ïoh 9406, u Medalsing Lyngdoh na ka Hill State People’s Democratic Party u ïoh 6082.
Ki ar ngut ki kyrtong haba kren ha ki lad pathai khubor ki la pynpaw ka jingsngewnguh bad jingaikhublei na ka bynta baroh ki paidbah nongkyrshan kiba na kylleng ki shnong kiba hapoh jong ka South West Khasi Hills District kiba la ai ka kti kamon ka kti kadiang ban pynjop don burom na ka bynta jong ki ha kane ka MLA Election 2023 bad ba ki long ki nongmihkhmat mynta ym tang jong ka United Democratic Party (UDP) hynrei jong ki paidbah hapoh ka Mawkyrwat bad Ranikor Constituencies.
Ha kaba ïa dei bad ki kam pynroi kumba ki la kular ba kin sa pynrep, kine ki kyrtong ki la pynpaw ba kin sa pyntreikam ïa ki ha ka rukom kaba dei da kaba ki la khot lang ïa ki paidbah kiba la kyrshan bad ki bym shym la kyrshan ba kin ai lem ka kti kamon ka kti kadiang khnang ba yn lah ban pyntyllun ïa ki kam ha ka rukom kaba dei namar ha ka jingïakhun ki don shibun ki jingïakynthoh hynrei mynta pat ka dei ban don ka jingïatreilang ba baroh ki jingkular kin urlong.
