Ai ksai ban leit rung NPP noh u Bah R.G Momin ban ïoh shong sorkar
>>110 vote liem u President rangbah ka HSPDP >>Hato bakla phong Jersey u Bah Kimfa Marbaniang?
Nongstoiñ, Lber 2: U MLA ba thymmai ka Rambrai Jyrngam Constituency u Bah R.G Momin, u lah ban pynïasoh noh ïalade sha ka party NPP, namar katkum ka jingpynpaw jong u sha ki lad pathai khubor u la ong ba kaba hakhmat eh ka long ban don ban ha ka liang jong ka sorkar.
“Nga ai nguh nyngkong eh ïa u Blei u ba la ibit ïa nga ban shim ïa kane ka lyngkor ban shakri na ka bynta ki paidbah ka Rambrai Constituency baroh kawei. Ngan pyrshang ban rung sha ka sorkar, namar ban don ha ka sorkar ka long kaba kongsan eh na ka bynta ban shakri ïa ki paidbah. Kata la ka long ha kaba wanrah ïa ki surok kiba bha, ki lynti syngkieng, ka koit ka khiah, ka pule puthi, ka rep ka riang bad kiwei kiwei pat, kiba u Blei u ai ha nga ba nga dei ban leh”, ong u Momin.
“Ha ka jingïadei bad ka kam khappud, ngan ïatreilang bad ki paidbah kumno ban leh ban pynbeit. Ka khubor ba nga don ban ong sha ki paidbah Rambrai ka long wad shwa ïa u Blei, namar kiei kiei baroh kin sa wan hi”. U la ong.
Lah ban kdew hangne ba u Bah R.G Momin kum u kyrtong shimet u la rynsied sha ka kam saiñ pyrthei bad ieh noh ïa ka kam Ophisar ha ka tnad pule puthi ha West Khasi Hills. Na ka bynta kiba bun ba lang, lehse ka long ka khubor kaba pynkyndit haduh katta, namar kum u kyrtong shimet u la lah ban khur haduh 9057 vote bad pynliem noh ïa u President rangbah ka Party HSPDP Bah K.P Pangniang da 110 vote, u kyrtong ba la ïoh khur 8947 vote.
Na ka bynta u Bah Kimfa Marbaniang u MLA barim ka Congress u ba la rung sha ka party NPP bad ba don jingkyrmen ban jop namar ïa ka sorkar ruh la ïalam da ka NPP. Pynban, imat ka Jersey thymmai ba u phong jong ka NPP ha Rambrai hi ki paidbah kim pdiang satia. Namarkata u la wan ha ka kyrdan kaba lai.