Nongpoh, Jymmang 05: Da ki spah ngut ki paidbah ki la mih ban ïalum ha phyllaw ka Nongpoh Town Shopping Complex ban pynlong ïa ka jingthang mombati na ka bynta ban kynmmaw burom ïa ka mynsiem ba la khlad noh ka Samla Walinda Binong bad ruh ban dawa ïa ka hok ba dei ban pynlong ïa ka jingtohkit kaba bniah ba tip ïa ka daw ba shisha jong ka jingkhlad katei ka samla pule na Ri Bhoi.
Kum ban pynkynmaw, ka Samla Walinda Binong, ka dei na ka shnong Nongagang ha ka thaiñ Marngar bad kaba la leit ban pulut ha ka School of Design ha Mody University, Rajasthan, hynrei kaei kaba la pynkyndit bad pynpangnud ka dei ka jingkhlad kyndit jong ka kumba la kynnoh da ki bor pynïaid katei ka University ba ka dih bih bad sdien phasi ïa lade ba kum ka ing ka sem kam lah satia ban pdiang.
Ïa kane ka jingthang mombati la pynlong da ka Shnong Nongagnag bad ki khun samla katei ka shnong, ha kaba la shim bynta ruh da ka seng ki Longkmie ka Nongpoh Area Women Welfare Association, ka HNYF Northern Region ryngkat ki Nongthoh Khubor na Ri Bhoi ba la pynsawa ïa ka sur ba dei ban tohkit bniah halor kane ka jingkhlad ba kyndit katei ka samla khnang ban paw ki jingshisha.
Da ki spah ngut ki khun samla na ka thaiñ Nongpoh ryngkat ki Longkmie bad kiwei kiwei ki riew rangbah ki la shim bynta ban thang ïa u Mombati bad la pynlong ruh ka jingduwai kyrpang na ka bynta ka jingjahthaid jong ka mynsiem katei ka samla ba la duh noh ïa la ka jingim khlem pat dei por.
Lyngba jong kane ka jingthang mombati, ki nongkren ba kynthup naduh ka Kong Meristela Lamare, kaba dei ka President ka Nongpoh Area Women Welfare Association, u President ka HNYF Northern Region, u bah Marcus Marten bad u Bah Cornelius Laloo kum u nongthoh khubor na Ri Bhoi, haba kren ki la pynpaw ka jingsngewkhia kaba jur halor kane ka jingkhlad kaba kyndit kane ka samla kaba la ktah ym tang ïa ka ïing ka sem, ki kmie ki kpa, hynrei wat ïa ki paidbah ka District bad ka jylla hi baroh kawei.
Ki la ong ruh ba kum kine ki kam shah thombor ki kynthei ha kiwei ki jylla sha rithor ka long kaba ym lah ban pdiang bad kum ki bor sorkar ki dei ban shim khia ban pynlong ïa ka jingtohkit khnang ban don ka jingshngaiñ ïa ki riew kynthei khynnah.
Ki la buh ruh ka jingkyrpad ïa ki kmie ki kpa haba ki phah pule ne phah trei ïa ki khun shabar kim dei ban shu phah khlem da wad jingtip bniah ha kino ki skul pule ne ki jaka trei, namar ha kine ki juk ba mynta ki bun ki riew shim kabu bad lada ngim long kiba peitngor bad kiba wad bniah kin wan kum kine ki jingjia kiba ym lah ban pdiang ha ka umlang ka sahlang.
Shuh shuh, kaba kham ban khia ha kane ka jingthang mombati ka dei ka jingdawa ba dei ban buh da ka jingtohkit kaba kyrpang ban tohkit halor ka jingkhlad katei ka samla da ka sorkar Meghalaya bad ka sorkar Rajasthan khnang ba baroh ki jingsah umdum kin sa shai bad ruh ba katei ka samla bad kiba haing hasem kin ioh ïa ka jingbishar kaba hok, ki la bynrap.
