Shillong, Jymmang, 05: Ki shipai Border Security Force (BSF) jong 4th Battalion ki la ïoh ban pyllait im 70 tylli ki masi na khappud jong ka West Jaiñtia Hills, Meghalaya ha ka sngi Palei ïa kiba la thmu ban khaii tuh sha ka ri Bangladesh.
Ki shipai BSF kiba ap ktep ha Amlarem ki la ïoh bat san tylli ki trok kiba la thep ïa ki 70 tylli ki masi ïa kiba la thmu ban kit sha ki bynta khappud. Ki shipai kiba la hap ban kthong haduh lai kilomitar shwa ban khang kdong ïa kine ki trok hadien ba ki nongniah trok ki la pynher stet ïa ka kali wat hadien ba ki shipai ki la aidak ban pynsangeh na ka bynta ban talasi.
Ki nongniah jong kine ki trok ki la ïohlad ban phed krad da kaba shim kabu ïa ka jingrben ka khlaw bad ïa ka jingkhohruh khohram ka surok. Hynrei ki shipai ki la ban kurup noh ïa ki san tylli ki trok bad kawei ka Bolero Pickup bad ïoh kem ruh ïa ki arngut ngut ki nongïarap ha kajuh ka jaka.
Kine ki arngut kiba la shah kem ki dei ki nongshong shnong ka jylla Assam. Ïa ki masi bad ïa kine ki arngut kiba la shahkem la aiti noh sha ki Pulit jong ka Amlarem Police Station ban leh ïa kaba donkam.
