Bym ai Sanad ïa u Rangbah Shnong, shah khang tala ka kamra treikam u Dy. Secy. ka KHADC

Shillong, Jymmang, 05: Ki nongshong shnong jong ka shnong Laitnongkseh ryngkat bad ka Executive Committee Dorbar Shnong, kaba hap hapoh ka Hima Sohïong ha ka sngi Thohdieng ki la khang tala ïa ka kamra treikam jong u Deputy Secretary ka Khasi Hills Autonomous District Council u Bah C. Pohlong uba long ruh u Administrator jong ka Hima Sohïong.
Ka Dorbar Shnong Laitnongkseh ka la kam ba ka jingleit khang tala ka long halor ka nongrim ba u Bah C. Pohlong u la thok ïa ka Executive Committee jong ka Dorbar Shnong Laitnongkseh ha kaba u la kular skhem ban ai Sanad ïa u Rangbah Shnong ha ka 5 tarik u Jymman,2023..
Ka Executive Committee jong ka Dorbar Shnong Laitnongkseh ka la phah da ka jingthoh sha u Administrator ka Hima ha ka 16 tarik, Kyllalyngkot, 2023 bad pan Sanad Rangbah Shnong jong ka Laitnongkseh kaba long katkum ka Raid Dorbar Shnong kaba la long ha ka 11 tarik, Kyllalyngkot, 2023 ha kaba ka Dorbar Shnong da kawei ka jingmut ka la jied ïa u Bah Diber Shabong kum u Rangbah Shnong jong ka shnong Laitnongkseh.
Hadien ba la leit ai jingthoh ha u Adminstrator ha ka 16 tarik Kyllalyngkot, 2023, na ka liang u Bah C.Pohlong u la kular ban ai Sanad noh hapoh shitaïew. Hynrei ynda ka EC ka la leit mih hadien shitaiew, na ka liang u Bah Pohlong ula buh bor biang ha kawei ka taïew.
Hadien katno katne por, na ka liang ka EC ka la ujor noh ha u Executive Member jong ka Elaka u Bah Jambor War halor kane ka jingpynslem ban ai Sanad. Na ka liang ka KHADC ka ka khot hajir ïa ka Executive Committee Shnong, ïa ka Executive Committee Raid Nongkseh bad ïa ka Executive Committee Dorbar Hima Sohïong ha ka 29 tarik, Lber, 2023.
Hadien kane ka jing khot hajar la ïoh ka jing bthah ba u Rangbah Shnong u dei ban ïoh ka Sanad na u Khlieh ha Hima. Na ka liang ka Executive Committee jong ka shnong ka la ïai buddien manla ka taiew ha kaba u Bah C. Pohlong ula kular kai ban ai na kawei ka taiew sha kawei ka taiew.
Hadien ba la ïai buddien beit manla ka taiew na ka liang jong u Bah C. Pohlong ula kular skhem ban ai noh ka Sanad ha ka 5 tarik, Jymmang, 2023. Kumta ha ka 4 tarik mynta u bnai na ka liang ka Executive Committee ka la leit ban kynduh biang ïa u bad ula kular skem ban ai beit ha ka 5tarik mynta u bnai da kaba u la ong sa wan shim por janmiet.
Hadien ba ka ki dkhot ka Executive Committee ryngkat bad ki katto katne ki riew rangbah jong ka shnong ki la leit ban shim ïa ka Sanad kumba u la kular u Bah C.Pohlong ul a phet noh na ka jaka treikam ha ka por ba ki dkhot ka Executive Committee ki la poi ha kamra treikam jong u ha ka por 3:00 baje nohphai sngi.
Ka EC ka ap haduh ka 5:30 baje janmiet hynrei na ka liang jong u Bah Pohlong um shym la wan mih satia sha ophis.
Kumta kum ka jingpynrem bad ka jingbitar halor ka jingtho jingshukor jong u ka Executive Committee bad ki paidbah ki la khang tala syndon ïa ka kamra treikam jong u Bah Pohlong.
Ha kajuh ka por ki riew rangbah jong ka shnong ki la pynpaw ka jingsngewsih halor kane ka jingshah thok ha u Bah Pohlong bad ka la dawa ïa ka District Council ba ka dei ban dei sospon noh syndon kum ïa une u Ophisar uba thok bad shukor ïa ki riew paidbah.