Leit jngoh ka Dr. Ampareen ïa ka longkmie ba sahkut thyrnia ha NEIGRIHMS Hospital

Shillong, Jymmang, 05: Ka Myntri ka tnat ka Koit ka Khiah ka Dr. M. Ampareen Lyngdoh ha ka sngi Thohdieng ka la leit jngoh ïa ka Kong Paltima Rani, ka longkmie kaba la shitom jur na ka jingsahkut jong u lyngkhot thyrnia ha ka met, hadien ba ka la kha ïa i khunlung ha ka 1 tarik mynta u bnai ha Ganesh Das Government Maternal and Child Health Hospital, Shillong.
Kum ban shu pyntip hangne, i khun jong ka Kong Paltima i la khladnoh ha Nazareth Hospital, Shillong hadien ba la pynkynriah na Ganesh Das Hospital iba la shitom jur.
Ha ka jingïakren bad ki lad pathai khubor, ka Myntri ka Koit ka Khiah ka la ong ba kum kine ki jingjia, kim dei satia kiba jia tang mynta, hynrei katkum ka jingïathuh jong u Director ka NEIGRIHMS Hospital, na ka DHS (MI) bad na ki doktor ba kum kine ki jingjia ki ju jia teng teng.
Ka la ong ba ïa ka Kong Paltima la pynkynriah sha Recovery Room hadien ba la kha ïa i khun lung hynrei la shem pat ba ka la theh snam namarba ka don jyrwit jyrwat ha ka jaka ba la kha ïa i khun. “Ine i longkmie i ju don ïa ki shitom ha ka met naduh ba la pun ïa i khun ba nyngkong, baar, balai bad mynta iba saw. Hadien ba la theh snam la hap ban ïalam biang sha ka Operation Theater (OT) bad ki doktor ka Ganesh Das ki sdang ban suh ïa kata ka jaka kha jong i bad ha ka jingsuh u dkut u thyrnia. Ki doktor ha Ganesh Das haba kim lap shuh ïa u thyrnia uba la dkut kim shym la leh jubor ïa ka jingmong bad ki la shu khang ïa ka jaka ba la mong namarba ka Ganesh Das Hospital kam pat don ïa ka Imaging Machine bad la donkam ban ïalam ïa ka nongpang sha NEIGRIHMS Hospital kaba don ïa ka Imaging Machine,” la ïathuh ka Dr. Ampareen.
“Ynda la leh ha ka Imaging Machine la lap ba u thyrnia um shym la don hajan u khyllai ne shano shano hynrei u don beit ha i jaka kha. Mar mar ki doktor ka NEIGRIHMS Hospital ki la ïalam sha Operation Theater ban sei ïa u khmut thyrnia,” la ïathuh ka Myntri.
Ka la ïathuh ba ha hospital ki doktor ki la ai snam ïa ka Kong Paltima.
“Kumba ngi la ïohi mynta hangne ka paw shai ba kam don kano kano ka jingbakla. Kum kine ki jingjia ki ju jia ha ka por ba puid. Ngi la wan ïakynduh ïa i Kong Paltima bad i la pynpaw ïa ka jingkmen ba ngi la ïoh ban ïakren bad i halor kane ka kam bad ka jingeh ha kaba ïadei bad ka jingsiew ïa ka bai sumar ha hospital namarba im don ïa ka MHIS Card,” ong ka Myntri.
“Ngi la ïakren bad u Director jong ka NEIGRIHMS ban ïarap ïa i bad ban peit ba ka jinglut ka jingsep kan ym pynjynjar than ïa i,” la ïathuh ka Myntri.
“Nga phah ïa ka jingsngewlem sha ka iing ka sem ka jong ki bad nga kit bok kitrwiang ba kane ka longiing long sem kan nang ïaid shaphrang ha ki snem ki ban nang wan,” la ong ka Myntri.