Shillong, Lber, 21: Ka ophis u Commissioner of Customs (Preventive), Ministry of Finance, ka Sorkar India, ha ka sngi Palei ka la pyntip ba ka la pynjulor haduh 1019.490 kilo u Ganja bad 2.437 kilogram u drok Heroin uba shongdor T. 19.17 klur ba la kurup hapoh ka NDPS Act, 1985.
Ha u kyrwoh ba la phah sha ki lad pathai khubor, ka ophis ophis u Commissioner of Customs (Preventive), Shillong ka la pyntip ba ka jingpynjulor ïa u drok la leh ha ka 21.3.2024 da kaba shu thang ha ka ding da ka jingsakhi lang jong ka Drug Disposal Committee ba kynthup ïa ki ophisar jong ka Customs bad DRI.
Ka jingthang ïa u Ganja bad u Drok la leh da ka ophis Customs da kaba pynthikna ba la buh bha bad pynjulor noh ïa ki mar ba la ïoh kurup khnang ba kan long kum ka jingai jingpynshai sha ki paidbah bad sha ka ri baroh kawei.
Ka jingpynjulor ïa u drok kan pynthikna ruh ba ka ri baroh kawei kan lait na ka jingshah teh mraw ha u drok.
