Kumba 15 lak ngut kiew ka jingwan ki nongjngohkai pyrthei sha Meghalaya ha u 2023 : Paul Lyngdoh

Shillong, Lber, 21: Kum ka jingthmu ban kyntiew ïa ki kam jngohkai ha ka jylla na ka liang ka sorkar jylla ka la lah ban ïoh ki jingkyrshan kiba biang napoh ka sorkar pdeng bad kiwei pat ki jaka treikam ba na shabar ri na ka bynta ban pynneh ïa ki jingpyrshang ban khmih ïa ka jingkiew jinghiar kiba wan jngohkai pyrthei sha ka jylla.
“Kum ka sorkar jylla ngi kwah ban kyntiew ïa ki kam jngohkai pyrthei ha baroh ki liang da ka jingpyrshang jong ka tnat ban peitngor ïa ka jingkiew jinghiar kiba wan jngohkai kaba mut ba ngin lah ban leit sha ka lynti kaba biang da ka jinglah ban pynlut ha kaba ïadei bad ki kam jngohkai pyrthei ha ka jylla,” ong u Mynti ka tnat Tourism u Bah Paul Lyngdoh.
Na ka liang jong u, ula ong ba haba kwah ban kyntiew ïa kane ka kam, na ka liang ka tnat ka la leh bun ki kam jingtei bad ki projek kiba don ka jingdawa kaba heh halor kam jngohkai.
“Ka sorkar ka kwah ban pynpoi ha kata ka kyrdan kaba ki nongwan jngohkai kin lah ban sah kumba 3 ne 4 sngi kaba rit eh da kaba ïoh ban leit jngoh sha kiba bun ki jaka bad ngi la ïoh ki jingkyrshan na ka sorkar pdeng bad kumjuh ruh ki lad jingïarap na ki jaka bei pisa ba nabar ri kum ka ADB,” u la bynrap.
U la ong ba katkum ka jingkheiñ ki la don kumba 15 lak ngut eiei ki nongwan jngohkai napoh ka jylla bad kiba nabar ri kiba la wan jngohkai ïa ka jylla Meghalaya ha u snem 2023.
Ka long kaba la lah ban ïathuh lypa ba kane ka karkhana jngohkai jong ka Meghalaya la khmih lynti ba kan kiew sha ka T, 12,000 klur ha u snem 2028, bad ka jingkheiñ manla ka snem jong ka jingwan kiba peitkai phutbol kan sa kiew sha ka 20 lak ngut. U la ong ba kane ka karkhana jngohkai pyrthei jong ka jylla ka la kiew ka jingïoh sha ka T. 1,600 klur ha u snem 2022 bad la khmih lynti ba kan nangkiew sha ka 10 per cent manla u snem.