Ka jingïasyllok ïakren bad ka Assam ka la sahteng noh ba don ka ilekshon MP, ong u MLA Nongpoh

Shillong, 21 Lber : Watla ha kine ki sngi bad ki por ba la leit la ïohi ba ka la don ka jingthnam bha kane ka jingïakren pynbeit pud hapdeng ka jylla Meghalaya bad Assam ha ka kylla kaba ar hynrei kane ka la sangeh noh mynta lah bun tylli ki bnai ha kaba kam shym la don shuh kano kano ka jingïalang hapdeng jong ki regional committee lane ka jingïaleit ïa jurip lang, watla ka Sorkar jylla ka la ong ba ka dang don ka jingïasyllok kaba manla ka por bad ka jylla Assam.
“Kum u dkhot ka regional committee jong ka Ri -Bhoi district ngi dang ïai syllok bad ka jylla Assam hynrei namarba ki ilekshon sha ka Lok Sabha ki ban sa long kane ka kam ka lah sahteng. Ngi kyrmen ba hadien ba la pynbna ïa ki result ilekshon MP ki artylli ki regional committee kin sa shim ka rai halor ka tarik bad ban ïaid shakhmat ïa kane ka kam kaba lah sahteng ban ïoh ïakren hapoh ka kylla ne ka wat kaba ar khamtam ha ki thaiñ ba don jingïapher hapoh ka thaiñ Ri-bhoi district,” ong u MLA ka Nongpoh MLA bad u dkhot jong ka Ri-Bhoi regional committee, u Bah Mayralborn Syiem.
Na ka liang jong u ula ong ba tang hadien kine ki ilekshon kan sa don biang ka jingïalang kaba bha kaban pynbud sa da ka jingïaleit jurip lang da kaba buh ruh ha ka jingmut ïa ka bha ka miat ki paidbah”.