Bthah ka Congress ïa ki District bad Block President ban ym kren kulmar ha ki rynsan elekshon
Shillong, Lber, 21: U President ka Meghalaya Pradesh Congress Committee (MPCC) ha ka sngi Palei u la ïathuh ba ka Congress ka la buh sngi ban thep kyrteng ha ka 25 tarik ha nongbah Shillong bad ha nongbah Tura.
U Bah Vincent H.Pala un sa thep kyrteng ha Shillong katba u Saleng Sangma un sa thep kyrteng ha Tura na ka bynta ban ïakhun ïa ka elekshon Lok Sabha ka ban sa long ha ka 19 tarik, Ïaiong, 2024.
“Ngi la buh ha kajuh ka sngi ha ka 25 tarik, Lber ban thep kyrteng ha Shillong bad ha Tura,” la ïathuh u Bah Pala ha ka jingïakren bad ki lad pathai khubor hadien ba la wai ka jingïalang bad ki nongïalam ka Congress na ki District bad ki Block kaba la long ha Congress Bhavan ha ka sngi Palei.
U la ïathuh ba ka party ka la lum ïa ki baroh ki District bad ki Block President, ïa ki katto katne ki Secretary jong ka party ban pynsngew ïa ki nongkren ki ban sa ai jingkren ha ki rynsan ïalap elekshon ha ki Constituency jong ki.
“Ka jingthmu ka long ban pynsngerwthuh ïa ki nongkren ban batai ïa ki kumno ban kren bad ym dei ban kren kulmar bad haba kren kulmar ki briew ki kyntait. Ngi la kyrpad ba kim dei ban kren kulmar bad ban beiñ ban khoh namarba ka Congress ka ïapher na ki party riewlum. Kiwei kiwei ki party ki lah ban kren katba ki mon ngi pat kum ka National Party ngi hap ban pyrkhat ïa kaba mynta bad ïa kaba lashai,” la ong u Bah Pala.
U la ïathuh ba shi bnai mynshwa, ka Congress ka la ai jinghikai ïa ki District President, ïa ki Block President bad ngi la ong ïa ki ban kren da ka akor ka burom bad namarba ka dei ka National Election ki dei ban tip ruh ïa ki jingkwah bad ki jingangnud jong ka Congress ban ïarap ïa ki nongrep, ban ïarap ïa ki nongtrei sorkar, ban ïarap ïa ki samla, ban ïarap ïa ki longkmie bad ban ïarap ïa ki khynnah pule bad kumta ter ter.
Shuh shuh u la ïathuh ba watla ka Congress kam pat pyllait ïa ka Manifesto hynrei ki jingdonkam ban pynrung ha ka Manifesto ngin sa pynrung shen. “Nga dang shu wan phai na Delhi hynnin ka sngi Balang bad ngi la ïoh ïa ka Manifesto kaba ngin sa pynkylla ktien na ka Phareng sha ka Khasi bad ngin sa sam ïa ki apil ba la leh da ka party ngi dang phah shon bad tang hapoh shitaiew ngin sa lah ban sam sha ki nongtrei ka party,” u la ong.