Shillong, Lber, 21: Ka Single Member Committee ba la thung da ka Ïingkashari Meghalaya High Court ka la ai jingmut halor ka jingdonkam ba ka Sorkar Jylla kan pyndep noh ïa ka jingleh audit ïa ka tyllong u dewïong ba la pyndonkam da ki karkhana Ferro Alloy bad ki Captive Thermal Power Plant jong ki karkhana dewbilat bad ban leh eiei hapoh ka shibnai.
“La ai jingbthah ïa ka Sorkar ba kan shim ïa ka rai ba khatduh haba ïadei bad ki karkhana Ferro Alloy hapoh ka shibnai,” ong u Justice BP Katakey ha ka interim report ba 21, kaba la aiti sha ka ïingkashari Meghalaya High Court.
La ong ba ka kaiphod ka ong ba ki kam leh audit ïa ka tyllong u dewïong bala pyndonkam da ki karkhana coke ka dei kaba la pyndep bad la dei ai ïa ki demand notice sha ki karkhana coke ha kaba ki karkhana coke hadien ba la ïoh pdiang, lait noh artylli kata ka M/s Jaintia Coke Pvt.Ltd bad ka M/S Abhi Coke Pvt.Ltd, kila siew ïa ki khajna bad kiwei.
La ïathuh ba la ai jingbthah ïa ka Tnat Mining and Geology ka Sorkar Meghalaya ba kan shim ïa ki sienjam ba dei ban shim ha ka ban pynïoh ïa ka pisa ba la pynpaw ha ki demand notice na kine ki artylli ki karkhana coke.
Ka la ong ba watla ka Tnat Mining & Geology ka la ïoh pdiang ïa ka jubab halor ka show cause notice na baroh ki karkhana Ferro Allow, hynrei kine ki dang don hapdeng ka jingbishar da ka Tnat ba dei khmih.
Halor ka jingtreikam jong ki karkhana cole bad ferro alloy, ka Tnat Mining & Geology ka Jylla ka pyntip sha ka Single Member Committee ba ki karkhana coke kiba ym shym la ïoh ïa ka Single Window Approval da ka Sorkar Meghalaya lane ka Consent To Establish (CTE) bad Consent To Operate (CTO) na ka MSPCB, kim shym la treikam shuh hapoh ka Jylla.
U Chairman bad u Member Secretary ka MSPCB ki la pyntip sha u Single Member Committee ba wat ki karkhana coke ki bym pat pynthymmai ïa ki CTO, ym shym la shuh shuh ïa ki ban treikam.
