Tang na ka scholarship ba ki pynlang, wanrah nam ki thei ïalehkai kynjat bol kiba thut ka bor ïohi
Shillong, Jymmang 22 : Ka kynhun ïalehkai kynjatbol kiba thut ka bor ïohi ka la khur ïa ka namjop ha ka kyrdan kaba lai ha ka jingïakhun ïa ka league jong ka National Blind Football Tournament held kaba la long ha Jamshedpur.
Katkum ka jingïoh ïakren bad ki nongïalam jong kane ka kynhun, ki la pyntip ba ki la ïakhun nyngkong ha ka pool league kaba don lai group ka group A, B bad C ha kaba ka Meghalaya ka hap ha ka group C ryngkat ka Telangana bad ka Madhya Pradesh.
Ha ka pool league kaba nyngkong jong ka group C kaba ïakhun hapdeng ka Meghalaya bad Telangana, ka kynhun jong ka Meghalaya ka la jop ïa ka Telangana da shi 1-0 bad ka la ïakhaid pat bad ka Madhya Pradesh kaba pynlong ïa ka Meghalaya ban don ha ka kyrdan kaba nyngkong jong ka Group C.
Ha ka jingïakhun jong ka final league pyrshah ïa ka Maharashtra, ka la shah rem noh da shi kol, bad ha ka final league kaba ar, ka la ïakhaid noh bad ka Uttarakhand.
Ha ka jingïakhun jong ka Uttarakhand bad ka Maharashtra, lada jia ba ka Uttrakhand ka rem, ka Meghalaya kan wan ha ka kyrdan kaba ar, hynrei sniewbok ba ka Uttrakhand ka jop ïa ka Maharastra, bad ka la pynlong ïa ka Meghalaya Blind Football Team ban ïoh ïa ka kyrdan kaba lai na ki khyndai tylli ki jylla.
Hadien ka jingjop jong ki, ka Meghalaya Blind Football Team ka la ïoh ban rah ïa ki trophy ha ryngkat bad ka song pisa.
Kum ban shu pynkynmaw, ki thei ïalehkai football ki la mih na nongbah Shillong khlem kano kano ka jingïarap, hynrei tang da ka scholarship kaba ki ïoh na ki skul bad ki college da kaba pyllang para ma ki ban leit ban mihkhmat ïa ka jylla sha kane ka tournament, bad na ka liang ka HYC Sengkmie hadien ba ka la ïoh jingtip ha ka sngi shuwa ba kin mih na la ka jong ka jylla ki la kner lem ki kti da kaba noh jingïarap da ka song pisa.
Ha kaba ïadei bad kane, na ka liang ki thei ïalehkai ki la buh ka jingkyrpad ïa ka sorkar khamtam ïa ka tnad badei peit ïa ki kam ïalehkai ha ka jylla, ban phaikhmat lem sha ki kiba don jingduna ha ka bor ïohi, khnang ba kin lah ban kiew ha ka kam ïalehkai football bad mynta ba ki dang pynkhreh ïa ka World Cup kaban long ha u Nailar lada ki shah jied ban mihkhmat ïa ka Ri India.