Tang ki kmie ki kpa kiba kwah ïa ki khun ban phyrnai ban ïa ki, la rakhe ïaka sngi ki samla ha Nongpoh

Nongpoh, Nailar 12: Ka ophis u District Sports Officer ka Ri-bhoi District haka jingïatreilang bad ka ophis u Deputy Commissioner ka Ri-Bhoi District mynta ka sngi kala rakhe ïaka International Youth Day ne ka sngi jong ki samla ha Parish Hall Nongpoh.
Ha kane ka sngi naka liang u Dr Abhishek Saini Deputy Commissioner ka Ri-Bhoi District u la shim bynta kum u kongsan haka jingdonlang u Bah Bobby L Nongbet DSO, Ri-Bhoi, u Michael Marak Officer Incharge ka Nongpoh Police Station, u Bah Jonathan Marbaniang District Informatics Officer ki samla pule na ki skul bad college ka Ri-Bhoi.
Ha kane ka sngi naka liang ki katto katne ki samla kila ai ruh ka jingkren halor ka jingïaid lynti jong ki naka district lyngba ki Youth Exchange prokram kaba la pynkylla dur ïaka jingim bad ka pyrkhat pyrdaiñ ka jong ki ba kila ioh ruh ban leit mihkhmat bad ïashim bynta haki prokram ba heh haka jylla, haka ri bad wat shabar ka ri India.
Haba kren ha kane ka sngi naka liang u Deputy Commissioner ka Ri-Bhoi District u la ong ba ki samla ki dei ka lawei jong ka ri bad ka jaitbynriew bad kaba kongsan haka jingïaid lynti jong ki ka long ba kim dei ban hap ne ngop haki jingsniew khamtam u drok.
U la ong ruh ba bunsien ki kmie ki kpa ne ki nonghikai ki mai ki shoh namar ki kwah ba ki khun ne ki khynnah kin kylla bad dei tang ki kmie ki kpa haka pyrthei kiba kwah ba ki khun jong ki kin kham phyrnai bad jop ïaka thong ban ïa kaba ki long ne don.
Namarkata u la kyntu bad ka long kaba kongsan ba ki khun samla ki dei ban ïaid haka lynti kaba dei khnang ba kin jop bad seisoh haka jingim bad jingthmu jong ki kumba ki angnud.