Da ka 8th Academic Excellence Award pynkup burom ka JSM ïa ki samla pule bad ki hynriew ngut

Khliehriat nailur 27 : Ka Jaiñtia Students Movement Central Executive Committee ba la lamkhmat da u President rangbah, u bah Leningstar Rymbai, myn ha 26 tarik u nailur 2026 ka la pynlong ïa ka prokram kaba kyrpang ha kaba ka seng ka la pynkupburom ïa ki 108 ngut ki samla pule kiba na ri lum Jaiñtia kiba la pass bha ha ki jingpule ha ki kyrdan bapher bapher, kumjuh ruh ka seng ka la pynkup burom ïa ki hynriew ngut kiwei pat kiba la leh bha ha ki kam bad jingtrei jong ki bad ha ki jingialehkai sports, ha kane ka sngi u Superintendent of Police East Jaiñtia Hills District, u Shailendra Bbamaniya IPS u la long u kongsan bad u Additional SP, u bah Spearsing Pasleiñ kum u Symbud kongsan.
Ïa ka prokram la pynlong ha Jaiñtia Eastern College Khliehriat.Ki san ngut kiba ka JSM ka la pynkup burom kyrpang ha kane ka 8th Academic Excellence Award ki kynthup ka nongpathaikhubor jong u Mawphor kaba na East Jaiñtia Hills District, ka kong Aihun Lyngdoh Tron, katkum ka JSM la ong ba ka kong Aihun Lyngdoh Tron ka dei kaba ju nohsyniang radbah ha ka imlang sahlang lyngba ka kam pathaikhubor, kaba treishitom, kaba don ka jingkitkhlieh ïa ka imlang ka sahlang lungba ki pathai khubor.
Kum ban shu bynrap ka kong Aihun .L.Tron ka la ioh khur ruh ïa ka khusnam bad jingpynkupburom na ka ophis u Deputy Commissioner ka East Jaiñtia Hills District ha ka 15 tarik u nailar 2022 bad khur ruh ïa ka National Award lyngba ka Media Federation of India, ka 20th Media Excellence Award 2026 ba la pynlong ha New Delhi ha ka 21 tarik u rymphang 2026.
Ha kane ka sngi la pynkup burom ruh ïa u President Synjuk Waheh Shnong East Jaiñtia Hills District, u bah Jespar Bareh.
Ka JSM ka la pynkup burom ruh ïa u bah Willingson Manar uba la ioh khur ïa ka takma ksiar ne gold medal ha ka jingiashimbynta jong u ha ka jingiamareh Para Atheletics kaba 400 meters ha ka 2nd North East Para Sports Meet ha Guwahati, la pynkupburom ruh ïa u bah Mebanlam Pohthmi, uba la pass bha ïa ka exam NEET na ka National Testing Agency bad u la ioh haduh 95.33 percent, kumjuh ruh u bah Chemi-i Nongpluh, uba la ioh khur ïa ka takma ksiar ne gold medal ha ka 1st Indo Bhutan International Games 2026 ba la pynlong da ka All Sports Games Federation International, ka kong Dakahi Kyndait, kaba dei ha heh pulit ne police officer kaba la jop ïa ka jingmareh thong ha ka Women’s 100K Category ha ka One Hundred World Cup Championship Ladakh Trail to Heaven 2026.
U Shailendra Bbamaniya IPS,u la ai khublei ïa ka Jaiñtia Students Movement kaba la pynlong ïa kane ka prokram pynkupburom ïa ki samla pule bad haba kren sha ki samla pule kiba la shah pynkupburom , u la iathuh ïa ka jingiaid lynti jong u naduh ba sdang haduh ba un da poi sha ka thong kata haduh ba un da long kum u IPS, u la ong ba bunsien u khlem pass ïa ki exam hynrei u iai pyrshang um kynrandien haduh ba un da pass, u la ong ruh ba u lada don kiba kwah ïa kino kino ki jinghikai ne jinglamlynti u long ba la kloi ban iarap lang ïa kiwei hateng hateng kum ki jingai jingmut ïa ki samla pule kiba kwah ban iakhun ïa ki exam UPSC/ IPS ha kaba yn iarap ruh da u Additional SP, u bah S.Pasleiñ ban ai jingmut ban iakun ïa ka MPS, ha kajuh ka por u la ai mynsiem bad pynshlur ïa ki samla pule ba kin ïaid shaphrang ha ki jingpule, ban treishitom ban poi sha ka thong bad ruh ban tei ïa ka lawei da kaba sdang ban buh noh ïa ka thong namar ban poi sha ka thong ka shim por kam dei kaei kaei kaba lah ban ioh noh tang hapoh ka shni sngi bad shi miet.
Kumjuh ruh, u Symbud Kongsan, u bah S.Pasleiñ, MPS u la ai khublei ïa ki nongialam bad ki dkhot jong ka JSM ba kin nang lah ban ïaid shakhmat ha kaba kum kane ka kam ba bha, u la ong ruh ba lehse nangne shakhmat ka seng kan lah ruh ban thaw ïa ki Career Counceling ban iarap ïa ki samla pule, u la ai ruh ka khublei kitbok kitrwiang ïa baroh ki samla pule kiba la ioh ïa ka jingpynkupburom ha kane ka sngi da ka 8th Academic Excellence Award.
Na ka liang u President jong ka Jaiñtia Students Movement, u bah Leningstar Rymbai, u la ban jur ïa ki samla pule ba ki dei ban long kiba don ruh ka akor ka burom ba ka kyrdan pule bad ka akor kin iaid ryngkat ryngkat ban kyntiew ïa ka longbriew manbriew u la sneng la kraw ïa ki samla pule da kaba ong”Lada duh ïa ka pisa phim shym duh ei ei, lada duh ïa ka koit ka khiah ka long ka jingduh kaba tang shibynta hynrei lada duh ïa ka akor ka burom kata ka wanrah ïa ka duh kaba khraw”
Nalor u kongsan bad u Symbud kongsan, kiba la ai jingkren ha ka prokram ki kynthup ruh u Director ka Jaiñtia Eastern College Khliehriat, u Dr P.Nongtdu, u bah W. Law uba la kren na ka liang ki kmie ki kpa, u General Secretary JSM, u bah Roitre Dkhar bad kiwei kiwei, ïa ka prokram la pyniaid da u General Secretary JSM Eastern Region, u bah Arwankijuh Dkhar bad la pynphuh pynphieng shuh shuh ïa ka prokram da ka jingshad na ki dkhot JSM Pamra Unit.