Shah khang khyrdep ki Bank ha kylleng ka jylla ha ki Seng Bhalang ba treikam ha ka Sngi U Blei

Shillong, Nailur 27 : Ki Sengbhalang bapher bapher ha ka Jylla, ha ka step Sngi U Blei, ki la leit khang khyrdep ïa ki Bank ha baroh kawei ka Jylla ban pyrshah ïa ka jingtreikam ha kane ka sngi ba Kyrpang ki Khristan, da kaba ong ba ka Sngi U Blei ka dei kaba kongsan ïa ki riewngeit Khristan ba kin leit Jingïaseng bad ruh ka dei ka sngi kut taiew ban shong jahthait ki nongtrei.
Ka hukum ba ki Bank ki dei ban treikam ha ka Sngi U Blei, kala wan na ka Sorkar Pdeng hadien ba ki nongtrei bank ki la pynbna ban pynlong ïa ka jingsangeh treikam ba lai sngi ha baroh kawei ka Ri naduh ka 28 tarik Nailur haduh ka 30 tarik Nailur.
Ka Sorkar kala pynpaw ba ka daw ba btah ïa ki Bank ba kin treikam ha ka Sngi U Blei ka long ban pynthikna ïa ka jing shakri ba khlem don jingthut hashuwa jong ka jingïakhih.
Hynrei ki Sengbhalang ha Meghalaya, ki la pyrshah ïa kane ka sienjam da kaba ong ba kane ka jingbthah kam shym la pyr khat lang ïa ka jinglong kongsan ka Sngi U Blei ha Jylla kaba don bun ki paid Khristan.
Ha Ri-lum Khasi-Jaintia, ki sengbhalang ba kynthup ïa ka Khasi Students’ Union (KSU), Federation of Khasi Jaintia & Garo People (FKJGP), Jaintia Students’ Union (JSU), HYC. HANM,HITO,COMSO bad kiwei kiwei, ki la don ki shnat treikam ha kylleng ki jaka, bad ki la khang ban treikam ïa ki Bank ha kane ka sngi.
Ha ri-Lum Garo, ki sengbhalang ba kynthup ïa ka AAYS, ADE, AYWO, FAF, FKJGP bad GSU, nalor kiwei kiwei, ki la ïa mih ryntih ban ïashim bynta ha kane ka jingleit khang ïa ka jingtreikam ki bank ha kylleng ki shnat treikam.
Kine ki kynhun Sengbhalang ki la ong ba ka Sngi U Blei ka long kaba kyrpang bha ïa ki paid Khasi Jaintia bad Garo, khamtam ia ki riewngeit Khristan, namar ka dei ka sngi leit ïingmane, pynlong jingduwai bad ter ter.
Ki la pynpaw ruh ïa ka jingsngewkhia halor ki nongtrei jong ki Bank, da kaba ong ba ïa ka Sngi U Blei dei ban kheiñ kum ka sngi shong jahthait jong ka kut taiew, ka ban ailad ïa ki ban pynlut por bad la ki bahaïing hasem, ban sangeh leh ïa ki kam ba ju leh manla ka sngi bad ban leit Iingmane.
Ki shnat treikam jong ki bank kiba shah khang khyrdep ki long naduh SBI, Punjab National Bank, Meghalaya Rural Bank, Indian Overseas Bank , UCO Bank bad kiwei kiwei.
Ka KSU ka la ong ba kane ka jingleh ka dei ka khubor sha ka sorkar pdeng ba ka Sngi U Blei ka dei ka Sngi kaba kyntang bad kyrpang jong ki paid Khristan ban mane Blei hapoh ka jylla kaba bun ki paid Khristan. “ Ngi kyntu ïa baroh ki Bank ban ñiewkor ïa kane ka Sngi ba Kyrpang khnang ba ki nongtrei kin ïoh ban pynlut por ba la ki khun ki kti bad ban leit mane Blei”.
Ki Sengbhalang ki la kyntu ïa ki nongtrei jong ki Bank ba kin pyrkhat bha ïa ka jingtreikam ha ka Sngi U Blei bad ban pyrkhat ruh ïa ka jinglong kongsan kane ka sngi ïa ka imlang sahlang bad ki nongtrei jong ki Bank.