Tang khyndiat ngut ki nongkyrshan BJP ba ïasoh NPP, ym 350 ngut: Bah Kharkrang
Nga don jingkyrmen ban ïoh ïa ka tiket
Shillong Naiwieng 09 : U Bah MH Kharkrang, uwei na ki kyrtong ba pan tiket na ka BJP na Shillong North Constituency u la ong ba ka jingkam ba ki don haduh kumba 350 ngut ki nongkyrshan ka BJP ba pynïasoh sha ka NPP Shillong North kam dei satia kaba don nongrim namar kiba leit ban pynïasoh shisha ki don tang lai ngut ha katei ka sngi.
“Ka jingshisha ka long ba lada phi pynïasoh sha kano kano ka party phi dei ban nyngkong ban leit pynïasoh bad ha ka video nga ïohi ba ki don tang lai ngut ki dkhot ka BJP kiba leit ban pynïasoh sha ka NPP ha katei ka sngi bad kiwei pat kidei kiba ym pat pynïasoh satia sha ka BJP,” u la ong haba kren bad ki lad pathai khubor.
Shuh shuh u ong ruh ba ki lah ban leit sha katei ka jingïalang tang ban ïohsngew shaphang ki mat treikam jong ka party bad ki lah ruh ban leit wat sha ki jingïalang jong kiwei ki party ruh ban leit sngap namar kum ki nongthep vote ki don ka hok ban sngap ïa baroh ki seng saiñpyrthei ha shwa ba kin rai ïano kin kyrshan,” la bynrap biang u Bah Kharkrang uba dei ruh ha kajuh ka por u Nongai ktien ka BJP.
Haba kren pat halor ka tiket namar ki don haduh arngut kiba pan, na ka liang utei u kyrtong u la ong ba ka jingai tiket hi ka shong ha ka sorbe ba la leh da ka party. “Kumba long mynta hi, nga la don kham hakhmat hynrei kum ka party pat kam lah ban khang ïano ïano ruh ban pan tiket na ka bynta ban ïakhun ïa ka elekshon MLA,” u la bynrap biang.
Shwa kane, u la ong ba ha kaba sdang eh ki don haduh san ngut kiba pan tiket naka BJP Shillong North hynrei katba nang ïaid ka por pat ki la kynran dien noh bad mynta ki don sa tang arngut kynthup lang ïa u.
“Kiwei ki kynran dien noh namar ki tip ba katkum ka sorbe nga kham don hakhmat bad kumta nga ruh ngam don shuh ka jingartatien ba ngan ïoh ïa ka tiket ban aireng ha kane ka elekshon. Watla katta pat nga shaniah ha ka rai jong ki nongïalam ka party,” u la ong.
Lah ban kdew hangne ba ki arngut ki kyrtong kiba pan tiket na ka BJP mynta ki kynthup ïa u Bah Michael Khyrsyntiew bad ruh u Bah Mariahom Kharkrang.