Ngim pat pura ka jingïoh jylla Meghalaya donkam ban ïoh da ka Khasi-Jaiñtia State: HSPDP

0

Shillong,Naiwieng 09: U President ka Hill State People Demoratic Party (HSPDP) u Bah KP Panngiang u la ong ba ka jingïoh ïa ka jylla Meghalaya kam pat pura satia namar ym don kino kino ki aiñ kiban pynskhem wat ïa ka jinglong trai ïa ka khyndew ka shyiap bad ka jingdon jingem jong ka kumba ïoh ki Mizo, ki Naga.
Haba kren bad ki lad pathai khubor hadien ba la dep ban pynkup burom ïa u General Secretary ba nyngkong ka HSPDP u Bah Arister Marbaniang u Bah KP Pangniang la ong ba kaei ka jingïakhun ki nongïaleh Hills State kam pat pura satia namar wat hadien 50 snem ba la ïoh jylla ruh u pud u sam ka jylla ym pat ïoh uba pura bad ba wat ïa ka hok longtrai ïa ka khyndew ka shyiap ruh ka sator pynban ha kine ki sngi.
U Bah KP Pangniang u la ong, “Wat hadien 50 snem ba ngi ïoh jylla ngim pat don la u pud u sam bad sngew lehraiñ ban ong ba ka jingpynbeit pud ngi dang hap ïakren wat haduh kine ki sngi” bad bynrap “Ban tih marpoh kyndew ruh ngi shah khang namar kam pat pura ka jingïoh jylla namarkata donkam ban ïoh jylla Khasi-Jaiñtia State noh hapoh ka Article 371 kumba long ka Nagaland bad Mizoram kaba ma ngi ki trai jylla ngin long kynrad ha la ka khyndew ka shyiap ym shuh ki mraw kumba long mynta.”
U la ong ruh ba ka jingjer kyrteng Meghalaya ïa ka jylla kam pynphalang satia ïa ki trai shnong ka jylla bad ka pynjem rngiew ruh ïa ki namarkata donkam ban ïoh jylla Khasi-Jaiñtia kaba ka kyrteng ruh ka kdew sha kiwei ki jaidbynriew ha India ba ka jaidbynriew Khasi-Jaiñtia ki dei kiba shong ha ka.
Haba kren halor ka jingpynkup burom ïa u Bah Aris Basaiawmoit ha ka ïingsah jong u ha Mawlai Mawroh u Bah Pangniang u la ong ba ka dei hok ïa ki pateng ba mynta ban pyrto ïa ki kam bakhraw bad ki synñiang kaba ki la noh sha ka jaidbynriew.
U la ong ba ka kynhun APHLC ha ka jingïalam jong kiwei ki la shu hun noh tang ban ïoh ïa ka Atonomous State ha u 1970, hynrei dei ha ka jingïalam kum ki jong u Maieid Hoppingstone Lyngdoh, u Bah Meshak Kharkongngor bad u Bah Aris Basaiawmoit kiba pyneh triang ba kin ym hun noh tang ha ka Sub-state katba ym pat ïoh ïa ka jylla pura.
U la ong ruh ba ka jingïoh jylla pura ka dei hok ba kine ki shipai len lade ba ïakhun ha kato ka por kin ïoh ka jingithuh na ka sorkar namar lada ym dei ba don kum kine yn ym don napdeng jong ki kiban ïoh wat tang ban long myntri sorkar ruh.
Bah Aris Basaiawmoit uba la ïoh ban pynkup burom ha ka HSPDP ha ïing sah jong u, u long u General Secretery ka party ha ki snem 1968 bad u long ruh uwei napdeng ki shipai ka Non-Violent Direct Action (NVDA) uba la shah kem bad sha set phatok da ki bun bun bnai ha Guwahati namar ka jingïakhih dawa jylla pura ha kito ki snem.

Leave A Reply

Your email address will not be published.