Shillong, Naiwieng, 09: Ka Bharatiya Janata Party (BJP) ka la nang ïohbor shuh shuh ha rilum Garo da ka jingpynïasoh jong ki 700 ki nongkyrshan jong kiwei ki party sha ka BJP.
Ha kane ka jingïalang, ki nongïalam jong kiwei ki party kiba la pynïasoh sha ka BJP ki kynthup ïa u Dormonath Sangma uba long u MDC ka NPP na Naguapara (Tikrikilla), u Drozil Sangma uba long u Chairman ka C&RD Block na Ampati, u Dular Sarkar uba long u Block Secretary jong ka Congress, u Pulin Hato u nongïalam ka NPP na Mendipathar lem bad ki 700 ngut ki nongkyrshan.
Ïa kine ki nongïalam bad ïa ki nongkyrshan la pdiang burom da u National Vice President jong ka BJP u M. Chuba Ao, u National Secretary jong ka BJP u Rituraj Sinha, u State President u Bah Ernest Mawrie, u BJP Media Convenor na Assam u Rupam Goswami, u State General Secretary u Thomas Mawrie bad kiwei kiwei.
U Chuba Ao haba kren ha kane ka jingïalang u la pynshai ba ka BJP kum ka seng saiñpyrthei kaba heh ha ka ri, ka dei ka seng kaba peit bad kaba shakri na ka bynta ka jingmyntoi jong ki paidbah.
U la ïathuh ruh ba ka thong treikam jong ka BJP ka long ‘India First, Party Second, Self Last’.
U State President u Ernest Mawrie u la pynpaw ïa ka jingthikna ba ka BJP kan sa ïoh ban thaw ïa ka Sorkar ha ka jylla da ka jingkyrshan na ki paidbah na baroh ki liang ha ka elekshon sha ka Ingdorbar Thawaiñ ka ban sa long ha u snem 2023.
Ki nongïalam kiba la pynïasoh bad ka BJP haba kren ha kane ka jingïalang ki la pynpaw ba ki paidbah jong ka jylla Meghalaya ki la ïohi ïa ka jingtrei jong ka Sorkar BJP hapoh ka jingïalam jong u Narendra Modi bad ki la sngewthuh ba dei tnag kane ka seng saiñpyrthei kaba trei na ka bynta ka bha ka miat jong ki paidbah.
Ki la ong ba ka jingïajan jong ka BJP sha ki paidbah ka la pynlong ïa ki ban pynïasoh bad kane ka party. Ki la pynpaw ba ki don ka jingshahniah ba ka BJP kan rat dyngkhong ïa ka bamsap bampong ha kane ka jylla bad bynrap ruh ba ki tip ba dei tang ka BJP kaba ailad ïa ki ban ïakhun pyrshah ïa ka bamsap.
