Ha ka jaka ban ai ïa ki kompeni 100 klur kan bha ba ai sha ki samla ban seng kam: MH Kharkrang

Shillong Naiwieng 09 : U nongai ktien jong ka BJP Bah Marïahom Kharkrang uba dei ruh u kyrtong ba pan tiket na ka BJP Shillong North Constituency, u la iathuh ba ha ka jingleit rung ïing briew jong u ha ka jingpynkhreh na ka bynta ka elekshon u lap ba jan baroh ki khun samla kim don ia ka kam ka jam kaba biang wat haba kito ki samla kiba la pyndep ia ki kyrdan kiba kham heh ruh.
Kumta halor kane, u la kyntu ia ka sorkar jylla ba kan kyrshan ia ki samla ba kin sdang ia ki kam ki jam lajong khnang ba kin lah ban long ki nongai kam ha ka jaka ba kin long ki nongwad kam.
U ong ruh ba ha ka jaka ban pynlut haduh 100 klur ha ka kompeni kaba lah ban ai kam tang kumba 100-200 klur ka la dei ban plie lad ïa ki samla da kaba kyrshan ïa ki khnang ba kin lah ban kylla long ki nongai kam. “Da kaba leh kumta, ki samla jongngi kin long ki nongai kam ha ka jaka ba kin long ki nongwad kam,” u la bynrap shuh shuh.
“Haba kren bad ki lad pathai khubor, u Bah Kharkrang uba dei ruh u heh pulit ba la shongthait bad pan tiket na ka BJP ban ïakhun ïa ka elekshon na Shillong North u la ong, “Kane ka jingbym ïoh kam ka long salonsar la ka long ïa ki samla ba pyndep ïa ka matrik haduh kiba la pyndep ïa ka Degree lane Engineer ruh. Nga shem ba jan baroh ki longiing ki khun jong ki kim don ïa ka kam ka jam .”
Shuh shuh u ong ruh ba lada u samla u la pyndep ïa ka jingpule Engineer hynrei u ïoh pat ka kam ba ka jingsiew ka long tang 5000 tyngka shibnai katei kam mut satia ba u la ïoh kam.
“Ki donkam ban ïoh ïa ka jingsiew kaba ïahap bad ka kam ba ki trei,” u la ong.
Utei u heh pulit ka jylla uba la shongthait noh na ka kam u la ong ba ka jingkyrduh kam kadei ka dawbah ba ki samla ki hap ban trei wat ïa ka kam ha kajingsiew kaba long tang 3000 ne 5000 tyngka shi bnai ruh.
Na ka liang jong u, u pynpaw ruh ba lada kane ka ïai bteng um tip shuh shaei ka lawei jong ki samla ka Jylla kan poi.
Kumta, u ong ba dei kitei ki daw kiba pynlong ïa u ban mih shakhmat ban aireng ha kane ka elekshon ban ïakhun na ki lad jingsumar kiba biang, ka pule puthi bad khamtam eh na ka bynta ki lad ïohkam ïoh jam lane ban plie lad ïa ki samla ha ki kam ki jam.
Haba kren pat halor ka jingmih khubor ba ki don haduh 8000 tylli ki kam ba thylli ha ka jylla, u la buh jingkylli ïa ka sorkar balei ba kam thungkam ïa ki samla ha kitei ki kam kiba shong thylli.
Da kaba pynpaw ba kam long kaba suk ïa ka sorkar ban pynmih kam tang shi khyllipmat hynrei u la ai jingmut pat ba kan kham suk ïa ka ban pyndap shwa ïa ki kam kiba lait thylli.
“Phi lah ban kyntiew ïa bun ki longiing jong kitei ki samla lada phi thep bad pyndap noh ïa kitei ki kam kiba shong thylli,” bynrap biang u Bah Kharkrang.
Ha kawei pat ka liang u ong ba ha kane ka juk mynta bun ki skul kim hikai ïa ki jinghikai ba ki samla ynda ki la pyndep ïa ka jingpule lane kum ki Degree ba kin ïoh kam ïohjam pat ha ki kam bym dei jong ka sorkar.
“Ki kompeni shimet kin peit shwa ka jingtbit aiu phi don. Kumta lada phim jingpyntbit ïa ki samla ha ka sap ba ki don kin ïai neh beit kum ki samla bym donkam donjam,” bynrap biang utei u nongïalam ka BJP.