Ki paidbah kin sa ai rai ha u 2023 la ka jingpynbeit pud ka long kaba biang neem: Dr. Kharlukhi

Shillong, Naiwieng, 09: U State President jong ka NPP u Dr. WR Kharlukhi ha ka sngi Baar u la ong ba ki paidbah jong ka jylla kin sa ai jubab ha u snem 2023 la ka jingshimkhia jong ka Sorkar Meghalaya Democratic Alliance (MDA) ban ïapynbeit ïa u pud u sam ba la sahteng bad ka Jylla Assam ka long kaba ‘dei lane kaba bakla.”
“Ngin sa leit sha ki paidbah ha u snem 2023. Ai ba ki paidbah kin sa bishar hi la ngi la leh ïa kaba dei ne kaba bakla namarba la san phew snem kynthih ym shym la leh eiei bad kaba ngi leh mynta ka dei ka jingpyrshang,” u la ong.
Katkum ka jingong jong u, ka long kaba suk ban shu kdew kti ïa ka Sorkar hynrei ban shu kynnoh kam ïarap eiei ruh em.
U Dr. Kharlukhi u la thew ïa kane ka jingkren hadien ba la mih ka jingpyrshah ïa ka jingïasoi ïa ka Memorandum of Understanding (MoU) bad ka Assam ha ka 29 tarik, Lber, 2022 ban ïapynbeit ïa ki jaka ba ïakajia pud ha ka wat banyngkong.
Ka Meghalaya bad ka Assam ki la sdang mynta sa ïa ka jingïakren ban ïapynbeit ïa u pud u sam ha ka wat kaba ar na ka bynta ki hynriew tylli ki jaka ïa kajia pud ba dang sahteng.
Haba kylli, u Dr Kharlukhi u la ong ba ha ki 50 snem baladep, kine ki ar tylli ki jylla ki la shu pynneh beit ïa ka Status Quo.
“Hynrei kaei ka Status Quo? Ka Sorkar Assam ka ïai kyntur sha u pud u sam bad ka Meghalaya ka ïai kynran dien. Lada ngi shu sahkut tang ha ka jingburom ïa ka Status Quo kan sa poi ka por ba ki (Assam) sa kyntur haduh Secretariat. Namarkata, ngi hap ban leh eiei,” u la ong.
U la ong shuh shuh, “phi la ïohi mynshwa ym haduh Khanduli hynrei mynta ki la poi haduh Khanduli. Ka Sorkar Assam ka la ïai kyntur pud bad ngi pat ngi shu ïai kynran dien.”
Ha kajuh ka por, une nongïalam ka NPP ula ong ba ka Sorkar MDA ka la pyrshang katba don la ka por ban ïa pynbeit ïa u pud u sam na ka bynta ka jingmyntoi jong ki paidbah.