Nongstoiñ, Rymphang, 3: Ka synjuk ki rawon na ka shnong Nonglang West Khasi Hills District kaba la tip kum ka Nonglang Pungsier Angler Association, kaba peitngor ban ïada ïa ki doh um dohwah ha ka wah Tyrsung bad ki shnat jong ka, ka la pynpaw ïa ka jingsngewkhia halor ka jingdon jong ki riewshim kabu ban pynïap pathar ïa ki doh um ha ki por tlang ba ka um ka la rit.
U Bah R.L.Nonglait Secretary ka synjuk u ba dei ruh u Headmaster jong ka Nonglang Upper Primary School, haba ïakren bad u nongthoh khubor u la ïathuh ba ka synjuk ka la ïaleh shitom ban pahara ïa katei ka wah, la khat hynriew snem kynthih haduh mynta bad ki dohkha doh pnat ha katei ka wah ki la roi bha. Hynrei wat hapdeng ka jingpahara kaba jur da ki dkhot jong ka synjuk ruh, dang don ha teng hateng ba ki riew shim kabu ki ïohlad ban leh ïa ki kam pynïap dusmon ïa ki dohkha da kaba theh da ki kynja dawai bih, ker jar bad ban siat bom ruh.
Na ka bynta ban ïada ïa ki dohkha don pnat ha katei ka wah, utei u nongïalam ka synjuk u la kyntu ïa ki paidbah jong ki shnong ba marjan kum ka Kriangrin, Siangra, Mynñiar, Thynri, Seiñduli, Mawsyrpat, Mawsaw, Nongsleh bad kiwei kiwei ki shnong ba kin ïatreilang ha ka ban sumar ïa ki doh kha doh pnat. Namar bun tylli ki shnat jong katei ka wah ki mih na kitei ki shnong bad lada ki paidbah ki ïatreilang, ki riew shim kabu kin ym ïoh lad satia ban pynïap pathar.
U la ong ruh ba ki don bun ki nongshong shnong kiba don ïa ki khlaw shimet harud katei ka wah, hynrei kitei ki khlaw ki la synlen lut na ka daw jong ka jingthang rnga pathar jong ki trai khyndew kaba la isangsot haba peit. Ha kajuh ka por u la ong ba ka jingsynlen jong ki khlaw kiba don haruh katei ka wah, ka dei ka daw kaba kongsan jong ka jingnang rit jong ka um namar ka jingthang ki kjat sngi bad ka jingtyrkhong ka khyndew.
U la ong ba ki don lai ki jaka ha katei ka wah kiba biang bha ban pynlong kum ki Sanctuary. Ha kitei ki lai jaka ka synjuk, ka la ïaleh katba lah ban pynneh ïa ka um da kaba ki leit trei bor met ban tyllun da ki maw. Hynrei na ka daw jong ka jingbym don ïa ka fund kaba biang ym shym la lah ban pyn itynnad ne ban pynneh ïa ka um haduh ba kan da biang pura. U la ong ba lada ïa kitei ki jaka la lah ban pynneh ïa ka um kat ban biang, wat ki briew kiba na kiwei pat ki jaka kiba jngai ruh kin sngew tynnad bha ban wan khwai dohkha.
