Thep kyrteng 6 ngut ki kyrtong ban ïakhun na Mawkyrwat bad Ranikor bad san ngut ki kyrtong ha West Khasi Hills

Nongstoiñ, Rymphang, 3: Ha ka sngi thohdieng ka 3 tarik Rymphang, ki la don san ngut ki kyrtong na ki ar tylli ki Constituency jong ka West Khasi Hills, kiba la pyndep ban thep kyrteng hakhmat u District Election Officer, na ka bynta ban ïaleh ha kane ka Election ban wan ka ban long ha ka 27 tarik mynta u bnai.
Kitei ki san ngut ki kyrtong kiba la pyndep ban thep kyrteng mynta ka sngi ki long u bah Kimfa S.Marbañiang u kyrtong ka NPP na Rambrai Jyrngam constituency, u bah Gabriel Wahlang kyrtong ka Congress na Nongstoiñ constituency, ba lai u bah Macmillan Byrsat na ka NPP Nongstoiñ constituency, ba saw u dei u bah R.G.Momin u kyrtong shimet na ka Rambrai Jyrngam constituency bad ba san u bah Goldenstar Nonglong u kyrtong jong ka Congress na ka Rambrai Jyrngam constituency. Kumta, tad haduh ka sngi thohdieng, ki kyrtong kiba la pyndep thep kyrteng ki long 6 ngut naduh ka sngi ba la plie jingkhang ban thep kyrteng.
Kitei ki san ngut ki kyrtong haba ïakren bad ki lad pathai khubor hadien ba ki la pyndep ban thep kyrteng, ki la ong ba ki don ka jingkyrmen kaba skhem ba kin poi sha ka thong ha kane ka election ban wan. Katto katne lei lei ki da pyni ki nia ki jutang bad ki kular kiba ym don shuh ban dang lah ban pynkhih ïa ki na ka nam jop. Hynrei, ka jubab hi ba kin ïoh kan dei ka rai ki paidbah ka ban mih pyrthei ha ka 2 tarik u Lber 2023.
Ka jingthep kyrteng jong ki kyrtong ki ban mih madan ha kane ka election ban wan kan dang bteng biang haduh ka 7 tarik mynta u bnai, kumba la pynbeit da ka Election Commission bad lashai ka sngi saitjaiñ ruh ka jingthep kyrteng kan dang bteng, ha kaba na ka liang ka UDP Nongstoiñ ka la pyntip ba kan pyndep noh ïa ka jingthep kyrteng. Katba na ka liang ki kyrtong HSPDP ki la pyntip ba kin pyndep ha ka sngi nyngkong jong ka taiew ban wan kaba dei 6 tarik.
Mawkyrwat: Ki 6 ngut ki kyrtong ki ban sa ïa khun ha kane ka MLA Election jong u snem 2023 sha ka Meghalaya Legislative Assembly mynta ka sngi ka 3 tarik u Rymphang, 2023 ki la ïoh ban thep ïa ki kyrteng jong ki ha ki Returning Officer, South West Khasi Hills District ban pynthina ïa lade ban long ki kyrtong ba pura ki ban sa ïakhun ha ki ar tylli ki konstitwensi kata na ka 36-Mawkyrwat bad 35-Ranikor.
Lah ban kdew ba ki 6 ngut ki kyrtong kiba la leit ban thep ïa ki kyrteng ki long ar ngut na ka 36 – Mawkyrwat Constituency bad 4 ngut na ka 35 – Ranikor Constituency bad ki kyrteng ki long u bah Carness Sohshang na ka Indian National Congress (INC), bad u bah H. Stalin Diengdoh na ka National People’s Party (NPP) kiba dei na ka 36-Mawkyrwat Constituency.
Katba na ka 35-Ranikor Constituency ki long u bah Pius Marweiñ na ka United Democratic Party (UDP), ka kong Victorealness Syiemlieh na ka Indian National Congress (INC) bad ar ngut ki kyrtong shimet kata u bah Mighter Marweiñ bad u Krenath Marak.
Hadien ba ki la ïoh ban pyndep ïa ka jingthep ïa ki kyrteng, kitei ki kyrtong ne ki candidates haba kren ha ki lad pathai khubor ki la pynpaw ïa la ki jong ki jong ki mat treikam jong ki kumno ban leh nangne shakhmat bad khamtam ba ynda ki la poi sha ka thong kin sa ïoh ban pynurlong ïa ki kam ba ki ki la thmu ha la ki jong ki jong ki kumba ki la ai lyngba ki kot jingkyrpad ne ki appeal kata ban wan rah ïa ka roi ka par, ban pynbiang ïa ki jaka sumar, ki jaka pule, ki jaka jngohkai, ki lynti ki synkien bad kiwei de ki la pynroi kiba biang ki ban long ki jingïarap ïa ki paidbah jong ka dong ka thaiñ.
Haba phai kren pat ha ka bynta jong ka jingïakhun me jingpynkhreh jong ki ha kane ka kynti, baroh ki kyrtong ki la pynpaw ba ka jingïaleh hi ka long beit ban poi sha ka thong jong ka jingjop khnang ba ki jingthmu kin urlong bad ban poi shata ka donkam ïa ka jingtrei shitom namar baroh ki kyrtong kiba la mih mynta madan ki long kiba ïa biang bor suda ha ka jingïaleh.
“Ka jingjop jong ngi kam shong eh ha ka jingtreikam jong ngi marwei marwei hynrei ka shong ha ka jingai ka kti kamon ka kti kadiang jong ki paidbah na kylleng ki shnong kiba ka don ka bynta ban leh kaba bha tam”, ki la ong.