Nongstoiñ, Rymphang 03: Ka HYC Mawshynrut circle lyngba ka Thiepjaphlang unit ka lah noh synñiang sha ki ar ngut kiba don duna dkhot met. Kita ki dei I kong Phaidashisha Kharbani bad I Heprit Bankyrshan Ïawphniaw. Ka jingleit noh synñiang na ka bynta kine ki ar ngut, ka dei kaba ka seng ka ju kwah barabor ban ieng ban ïarap sha kito kiba donkam ïa ki jingïarap.
Ha ka jingleit ai jingïarap, la pynïaid ïa ka jingïalang da I samla Ardonald Marbaniang Assistant GS Mawshynrut circle bad la ïoh jingkren na u Samla Losbingwel Lyngkhoi President HYC Mawshynrut circle u ba la kren ba ka la dei ka kamram jong ka seng, ban ïarap ïa kiba duna dkhot met namar bun na kiba duna dkhot met kim shem la ïoh ka jingïarap na ka sorkar watla ki lah biang ki disability certificate.
Ka seng ka la kular ruh hakhmat jong ki, ba kin ïai don ha syndah jong ki bad kin dawa ruh na ka sorkar ban pynïoh ïa ka jingmyntoi na ka bynta jong ki. Na ka liang u Samla Daniel Nongpud President Thiepjaphlang unit u la kren ba ka seng kan ïai buddien bad dawa ïa ka hok ba ki dei ban ïoh.
