Tang ka HSPDP kaba don shisha ki nongrim ba skhem ka jaidbynriew: Shakliar Warjri

Nongstoiñ, K’lyngkot, 6: Kum ka jingpynkhreh ïa ka election, mynta ka sngi thodieng ka 6 tarik Kyllalyngkot ka Hill State People Democratic Party Mawthadraisan consti-tuency, ka la lumlang ïa ki paitbah nongkyrshan jong ka Parïong rim zone ha Nongshilong ha kaba da ki hajar ki paitbah ki la tuid sha katei ka jingïalang.
Ha kane ka jingïalang, la pynsngew ïa ki kyrteng jong ki nongïalam na kiwei pat ki party kiba la wan ban pynïasoh sha ka HSPDP, ba kynthup ïa u bah Mikstar Marngar president barim jong ka Mawthadraishan Block Congress Committee, u bah Peter Marweiñ president ka UDP Parïong area bad kiwei kiwei ba kynthup na ka Women Wing, bad Youth wing.
Na ka liang u Bah Shakliar Warjri president ka HSPDP Mawthadraishan u ba dei ruh u kyrtong na ka bynta ka election ban wan u la pdiang sngewbha sha baroh. Ha kajuh ka por u la pynskhem ïa u bah Mikstar Marngar bad u bah Peter Marweiñ kum ki working president.
Ka Kong Irin Lyngdoh Nonglait MLA barim ka Mawthadraishan haba ai jingkren ha kane ka sngi, ka la ong ba ka jingwan pynïasoh jong ka sha ka HSPDP ryngkat ki hajar ngut ki nongkyrshan ba shitrhem jong ka, ha ka por ba ka ïaleh ïa ka election na ka Congress ka pynthikna ba u bah Shakliar Warjri un poi sha ka thong ka jingjop. Ka la pynkynmaw ruh ba dei ha ka por ba ka long kum ka MLA, ka la lah ban wanrah ïa ka Mawthadraishan C&RD Block kaba la long ka jingmyntoi kaba khraw ïa ki paitbah.
U bah Shakliar Warjri kum u kyrtong haba ai jingkren, u la ong ba la lai snem kynthih u la pyrshang ban ïakynduh ïa ki paitbah ha man kawei pa kawei ka shnong hapoh ka constituency, ban kyrpad ba kin ai ka jingkyrshan bad ha ka jingleit jong u ha man la ki shnong, u la lap ba ki dang don shibun ki jingduna bad hapdeng ka jingpyrshang ka jong u, ki don shibun ki jingshah kynthoh da kaba ong ba ka jingwan ïaleh election jong u ha Mawthadraishan, ka dei tang na ka bynta ka business jong u, hynrei kitei ki jingkynthoh baroh ki dei tang ki jingkren kut lad jong ki katto katne ki ba pyrshah .
Wat la katta ruh u la ong ba um pynsngap satia ïa ki jingkynthoh bad um sngew donkam hi ruh ban pyrshah ne ban woh daw ïa ki nongkynthoh, namar ka thong ka jong u ka long ban shakri ïa ki paitbah da ka jingieit khlem da ñew shilliang khmat la rit ne khraw la duk ne riewspah, hynrei baroh ki long kumjuh. Nalor kata u la ong ba ki don ruh kiba kynthoh ba u dei u nongwei, hynrei u pynkynmaw ba u (L) bah Hopingstone Lyngdoh u la jop kum u MLA la palat sanphew snem na Nongstoiñ, hynrei um shym la dei satia u nongshong shnong u ba la kha la pun ha Nongstoiñ, pynban ki paitbah ki ieit bad ym don ba lah ban pynrem ïa u.
U la ong ba lada ki paitbah ka Mawthadraishan constituency ki kwah ban wanrah ïa ka jingkylla, kim dei ban shah ïalam bakla ha ki jingpynbiej kiba da kumne da kumtai. U la ong ruh ba bun ki briew ki ju kren beiñ kren khoh ïa ka HSPDP, khamtam ki nongkyrshan jong kiwei pat ki party. Hynrei kumba ka long mynta kim tip pat ba ki paitbah jong ka Mawthadraishan constituency ki la sngewthuh shai bad ki la kwah shisha ban khie im biang sa shisien ïa ka HSPDP. Namar dei tang kane ka party kaba don shisha ïa ki nongrim kiba skhem na ka bynta ban ïada ïa ka jaitbynriew Khasi.