Boko, Nohprah 6: Ka jingïakynad hapdeng ki riew paidbah ka la khie kynsan ha ka sngi palei ha Boko, namar ka jingïakajia pud hapdeng ka Assam bad ka Meghalaya hapoh ka shnong Bhalukmari kaba hap hapoh Boko revenue circle. Kane ka shnong ka don ha Kamrup District Assam khappud bad ka West Khasi Hills District.
Katkum ki khubor la ïathuh ba ki katto katne ki nongïalam na Meghalaya ki la pynlong ïa ka jingïalang hapoh kawei ka skul shimet ha ka shnong Bhalukmari kaba hapoh Assam. Hynrei la ong ba u nongïalam shnong u la khang pyrshah ïa ki ba kin pynlong ïa kiba kum kine ki jingïalang. Pynban kine ki briew ki la kam ba kane ka dei ka jaka jong ki bad la kynnoh ruh ba ki la pyrshang ban thombor ïa ki nongshong shnong na Assam.
“Katto katne ki nongkyrshan na Meghalaya ha ryngkat khyndiat ngut ki nongïalam na Meghalaya ki la pynlong ïa ka jingïalang ha kawei na ki skul shimet hapoh ka shnong ka jong ngi. Hadien ba ngi la ïoh jingtip halor kane, khyndiat ngut na ngi kaba kynthup ïa u president jong ka shnong, ngi la kyrpad ïa ki ba kin pynsangeh ïa kane ka jingïalang bad maham ruh ïa ki ba kim dei satia ban pynlong ïa kino kino ki jingïalang kiba ïadei bad ka Meghalaya hapoh ki jaka pud jong ka Assam,” ong u nongïalam shnong u Sanjit Rabha.
“Kine ki briew na Meghalaya ki la sdang ban ïa nia bad kam ba ka dei ka jaka ka jong ngi bad pyrshang ruh ban thombor ïa ngi. Kumta ngi la phet krad noh mardor na kane ka jaka bad shong rieh sha ka jaka kaba shngaiñ,” ong shuh shuh utei u nongïalam shnong.
“Ki briew na Meghalaya ki la pyrshang ban seng skul hapoh ka shnong Bhalukmari, Assam ïa kaba yn pynïaid da ka sorkar Meghalaya. Kumta, ngi la leit sha katei ka jaka ban pynsangeh ïa ki hadien ba katei ka jingjia ka la wan jia,” ong u president jong ka shnong u Ruhini Kumar Rabha
Khyndiat por hadien jong kane ka jingjia, ka kynhun ki pulit Assam hapoh ka jingïalam u incharge ka Boko Police Station u Phanindra Chandra Nath bad u Revenue Circle Ophisar ka Boko u Dibash Bordoloi, ki la hiar sha katei ka shnong bad pynlong ka jingïakren bad ki briew na baroh ki ar jylla.
“Namar ki katto katne ki jingsngewthuh bakla ki la wanrah ïa kane ka jingjia, hynrei mynta la lah ban teh lakam ïa ka jinglong jingman bad ngi la ïakren sani bha halor kane ka phang khnang ban lah ban pynneh ïa ka shongsuk shongsaiñ,” ong utei u Revenue Ophisar ka Boko.
