Plie mawnongrim u Bah Pius Marweiñ ïa ka Sub-Centre ha shnong Ngunraw

0

Mawkrwat, K’lyngkot, 06: U bah Pius Marweiñ, u nongmihkhmat jong ka Ranikor Constituency ula ïoh ban plie ïa u Mawnongrim na ka bynta ban tei ïa ka jaka sumar nongpang ka Sub-Centre kaba ha ka mang pisa ba T. 55 lak tam ei ei ban tei hapoh jong ka shnong Ngunraw, South West Khasi Hills District.
Lah ban pynpaw ba ka jingïoh ban buh mawnongrim ïa ka Sub-Centre ha shnong Ngunraw ka dei hadien da ki phew phew snem jong ka jingangnud ki paidbah hapoh jong ka shnong bad da ka jingshimkhia jong u nongmihkhmat ryngkat ka jingïatreilang bad ki bor sorkar kane ka jingangnud ka la urlong, bad kyrmen ba da ka jingdon jong kane ka jaka sumar kan long shisha ka jingmyntoi ïa uba bun balang, ki khun shnong, khun thaw ha kaba ïa dei bad ka koid ka khiah.
Haba kren ha ka jingïalang, u bah Pius Marweiñ u la pynpaw ka jingsngewnguh ïa ka tnad ka koid ka khiah ba hadien da ki phew phew snem jong ki jingphohsniew ki paidbah ban ïoh noh la ka jong ka Sub-Centre ha kane ka shnong Ngunraw ka la urlong shisha ha kaba ka jingwan buh ïa u mawnongrim ruh kam dei shuh tang kum ka dak hynrei ka dei kawei na ki jingkyrmen ïa ka lawei jong ki paidbah kiba donkam ka jingïarap ha ka liang ka koit ka khiah.
“Kane ka dei ka sngi jong ka jingsah jingkynmaw ïa ka shnong bad ïa ka tnad ka koid ka khiah bad ruh na ka bynta jong nga kum u nongmikhmat na kane ka dong ka thain ba ki la lah ban plie ïa u mawnongrim ban tei ïa ka Sub-Centre hapoh shnong Ngunraw South West Khasi Hills District”, ong u bah Pius. Namarkata, ai ba lyngba kane ka Sub Centre kan sa long kawei ka bynta ban ïarap ïa ki khunshnong khunthaw bad ïa baroh lang naduh kiba rit haduh kiba la san ba kan pynsuk ïa ki ba kim don kam shuh beh ban leit shah sumar ne ïoh ki lad jingïarap shaduh Rangthong PHC ne Mawkyrwat CHC na ka bynta shibun ki jingdonkam bad ki jingshitom ba tang malu mala hynrei kin ïoh na kane ka hi ka Sub Centre.
Ha kajuh ka por, u bah Pius Marweiñ u la pynpaw ruh ba ki don katto katne ki ‘riew rangbah kiba la kynthoh ïa u kum u nongmihkhmat ba um pat lah ban leh ei ei ha kine ki saw snem ba la dep na ka bynta ka roi ka par hapoh jong konstituensi, hynrei kane ka paw shai ba mynta ka sngi ka 5 tarik u Kyllalyngkot, 2023 ba ki paidbah ki la sakhie hi la ki jong ki khmat ïa kiei ki kam ba na ka liang jong u u la leh, wat lada kiwei ki nongmikhmat ba la leit ba da ki phew snem kim lah ban pynurlong, hynrei hadien ba u la shimti kum u nongmihkhmat tang ha ki khyndiat snem u la lah ban pynurlong ïa ka jingkwah ki paidbah.
“Ngam shem la shong kli kti, ngi ïa kynduh bad shong jingïalang la bun bun sien ban pynsngew bad pynkynmaw ha ki bor sorkar halor ki jingdonkam ki paidbah bad kumjuh ruh ha u DM&HO ka South west Khasi Hills District ha ryngkat lang da ka jingtrei shitom ruh na ki nongïalam jong ka shnong Ngunraw”, la bynrap u bah Pius Marweiñ.
U Dr. F.R. Lartang, DM&HO ka South west Khasi Hills District haba kren kum u symbud kongsan ha kaba u ïoh ban pynshai shuh shuh halor kane ka bynta bad kumjuh ruh u la ai ki symboh pyrkhat ha kaba ïa dei bad ka koid ka khiah bad ki jingmyntoi na ka bynta ka jingim jong u briew kaba manla ka sngi.
Ïa ka jingïalang ha kane ka sngi la pynïaid da u bah Dmingland Thongni, Myntri Shnong Ngunraw ha ka jingïadon lang ruh naduh ki Myntri Shnong, ki paidbah bad la pynshit pynshngaiñ shuh shuh lyngba ki jingrwai bad jingshad na ki samla na kane ka shnong Ngunraw.

Leave A Reply

Your email address will not be published.