Da ka song pisa bad ki tiar ïing, noh synñiang ka FKJGP ïa ka longïing ha Shnong Photjaud

Mawkyrwat, K’lyngkot 06: Ka Federation of Khasi Jaiñtia & Garo People’s (FKJGP) jong ka South West Khasi Hills District ha ryngkat ka Central Body mynta ka sngi ki la leit ban noh synñiang da ka song pisa bad ki tiar ïing ïa kawei ka longïing ha Shnong Photjaud, South West Khasi Hills District.
Ka jingleit ban noh synñiang jong ka seng ïa katei ka longïing ka dei hadien ka jingjia ha ka 21 tarik Nohprah, 2022 ha ka por 12 baje shiteng sngi ha kaba ka ding kaba klang ka la bam suh ïa ka ïing bashong basah u bah Honestboy Syiemlieh bad ka kong Merity Shylla ha ryngkat ki 4 ngut ki khun.
U bah Eldie N. Lyngdoh, Vice President ka FKJGP Central Body haba kren ha ka jingïalang ba lyngkot u la ong ba kine ki jingjia ki dei kiba U Blei hi U tip ha kaba U la ri U la sumar ba ki mynsiem briew kin lait na ki jingjianba sngewsih,kumta ka long ka burom ïa U Blei ba U la leh phylla ïa kane ka ïing ka sem.
U la ong ruh ba kum ka seng hi haba don kum kine ki jingjia kim lah ban shu peit kai hynrei da ka mynsiem jong ka jingsngewlem mynta ka sngi ka 6 tarik u Kyllalyngkot, 2023 ki la leit ban noh synñiang da ka song pisa bad kumjuh ruh da ki tiar ïing ba kin ïoh ban pyndonkam. “Watla ki long ki tiar kiba rit eh, to shim ïa ki ba kin long ki jingmyntoi bad jingkyrkhu na ka bynta ki sngi ki ban sa wan”, ong u bah Eldie.
Ka kong Merity Shylla ha ka jingkren jong ka ka la pynpaw ka jingkhublei kaba kyrpang na ka bynta ka FKJGP kaba la wan ban noh synñiang. “Khublei shibun, ïa ka jingleh bha jong phi to U Blei Un ïai don ryngkat lem bad phi kum ka seng ba phin nang lah ban pyntyllun ïa ki kam nangne shakhmat”, ong ka kong Merity Shylla.
Ha kane ka sngi la ïa donlang naduh u bah Kenes Lyngdoh Nonglait, President ka FKJGP South West Khasi Hills District, u bah Balse Kharbani, Secretary ka FKJGP South West Khasi Hills District, u Secretary Shnong Photjaud, u bah S. Shylla lem bad ki nongkitkam ba hakhmat jong ka seng.