Nongpoh, Rymphang, 21: Hadien ka jingtrei shitom ki bor pulit ban wat ïa u trai jong ka YouTube Channel bala ai kyrteng “7Trep TV” kaba la thep da ka dur jong u Bah BB Makdoh Chairman ka Synjuk ki Rangbah Shnong Ri-Bhoi District ha kawei naki video bala pynmih ha katei ka channel bala kynnoh ba u kren pyrshah ïa u Bah Pyniaid Sing Syiem kaba dei tang ka khubor thok bad ïalam bakla ïaki paidbah, ki pulit kila lap noh ïa u trai jong katei ka channel bad kumjuh ruh uwei u paralok ba donkti lang.
Katei ka jingpyrshang jong ki pulit ban wad ïa u trai ba pynmih ïa katei ka video ka dei hadien ba naka liang ka Synjuk ki Rangbah Shnong Ri-Bhoi District hynnin ka sngi kila leit ban ujor da ka ejahar ha Nongpoh Police Station pyrshah ïa katei ka channel hadien ba la pynmih da ka dur u Bah BB Makdoh watla khlem pynpaw kyrteng kaba la ktah ruh ïaka dur bad ka longryngieng jong utei u nongïalam shnong.
Kitei ki arngut kiba donkti haka jingpynsaphriang ïaka khubor lamer la tip kum u samla Fernando Diengdoh, u trai jong ka Youtube channel “7Trep TV” u ba la pynmih ïa katei ka khubor bad u ba shong ba sah ha Kynshi bad u samla Neverson Marbaniang ba pule ïa katei ka khubor “Voice Over” ba shong ba sah haka Shnong Erpakon, Ri-Bhoi District.
Na ka liang kitei ki 2 ngut ba pynmih ïaka video bad kumjuh ruh ka jingkren ha katei ka video kila wan mih mynta ka sngi ha Nongpoh Police Station ban ïakren ruh markhmat bad u Bah BB Makdoh ryngkat ki nongïalam ka Synjuk ki Rangbah Shnong ban pan map hakhmat kitei ki nongïalam, bad naka liang kitei ki nongïalam kila sneng bad kyntu ba kim dei ban mlien ban leh kum kitei ki kam ban kwah kamai pisa da kaba thad ïaka longrynieng jong kiwei khamtam ba kim dei satia ki nongthoh khubor kiba la ithuh da ka sorkar ha kaba kila kyrpad ruh ba kidei ban wan pan map ryngkat bad ki bahaiing hasem lashai ka sngi.
Haba kren sha ki lad pathai khubor naka liang u Bah BB Makdoh, u la ïathuh ba tang hadien 3 kynta ba ki la wan ban ujor ejahar pyrshah ïa katei ka YouTube channel ha Nongpoh Police Station, naka liang ki bor pulit ki la lap noh ïa kitei ki arngut kiba la donkti ha katei ka kam ban pyn saphriang ïaki khubor lamler, bad u la ai khublei ïaka tnad pulit bala shimkhia ïa ktei ka kam khlem pynslem.
U la ïathuh ba kum ki nongïalam jong ki shnong bapher bapher kim shym la don kano kano ka daw bad kitei ki arngut ki samla bad u la ong ruh ba ki long kloi ban ïa map hynrei kitei ki arngut kin hap ban wan mih biang ha Nongpoh Police station lashai ka sngi ha ryngkat bad ki Kmie ki kpa lane bahaïing, khnang ba ki bahaïing jong ki ruh kin tip ïa kaei kaba ki khun jong ki, ki leh.
Shuh shuh u Bah BB Makdoh u la maham ruh ïa kitei ki arngut bad kumjuh ïa kiwei kiwei ki YouTube channel kiba kharoi ha kine ki sngi ba kim dei ban pynmih kum kine ki khubor thok ki khubor lam ler kaba lah ban ktah ïaka long rynïeng jong u briew bad ïalam bakla ruh ïa ki paidbah.
