Mawkyrwat, Rymphang 21: Ka long kaei kaei kaba pynsngewkmen ïa ki paidbah jong ki saw tylli ki konstitwensi ka Mawphlang, Mawsynram, Mawkyrwat bad Ranikor bad kiwei kiba ju pyndonkam ban ïa ka surok kali ha kaba mynta ïa ka surok ba dei ïaid na Mawphlang sha Weiloi la paw ki dak ki shin ban kham pynheh ïa ka da kaba shna da ka Intermediate Road (Phase – I).
Lah ban ong ba ka surok ka dei u budlum jong ka ïoh ka kot bad ka pynsuk ruh ha ka leit ka wan na ka bynta ki paidbah nongshong shnong bad nongleit nongwan hynrei lada ki surok ki long kiba sniew bad lada ki jingpyntrei ki long ym katkum ka jingong, “ba ka surok ka dei u budlum jong ka ïoh ka kot”, kan sa long leh noh ei.
Haba ïa kren pat ïa ka phang jong ka jinglong jingman ka surok Mawphlang sha Weiloi haduh mynta ka la long kaba sniew shaba palat bad katkum ka jingkylla ka por ka lah sdang ban khapngiah bad donkam ban pynheh noh ïa ka, namar ka jingkiew ki kali kiba ïaid lyngba katei ka surok ka long da ki spah tylli bad lah ban poi ruh sha ki hajar namar ym tang ki kali kiba mih na Weiloi hynrei na kane ka surok kiba pyndonkam ban ïaid ruh na ki saw tylli ki konstitwensi.
Namarkata, ka long kaba donkam ba haba la sdang ban paw ki dak ki shin jong ka jingpynheh ne jingpyntrei ïa ka surok, ki nongpyntrei ne ki contractor ki dei ban trei kham stet ym ban pyrkhat tang ka ma-lade namar ka myntoi tang ïa lade ka buh jingeh pat ïa ki nongïaid nongïeng hangta kam don jingmut. Shuh shuh la ïohi ruh ba ïa kane ka surok Mawphlang – Weiloi la sakhi ruh ba mynta naduh Mawphlang sharum ki la sdang ban siang rong bad la sdang ban jam ïa ka them jong Lyngïong, hynrei kane ruh kam pat da biang lut.
Ha kawei pat ka liang lah ban ong ba ka jingsdang bun ki kali kiba ïaid na kane ka surok bah Mawphlang – Weiloi ka la sdang ban wanrah ïa ka jingkhapngiah bad buh jingma ruh ïa ki nongleit nongwan khamtam ïa ki heprit kiba ïaid lynti ha katei ka surok. Ngi ïohi ïa ka jingpynpaw ka sorkar ban pynheh bad pynbha noh ïa katei ka surok ka thaiñ naduh Mawphlang shaduh Mawsynram, ngi kyrmen ba katei ka jingthmu kan pynurlong ïa ka jingthrang ki paidbah ka thaiñ kiba ju ïa kren na ka por sha ka por ba lah donkam ban pynheh bad pynbha noh ïa katei ka surok.
Ym tang kata, ïa ka surok Weiloi – Mawkyrwat ruh ka la don mynta ha ka jingïakren bad ki la sdang ban pynkhreh shait shait, namarkata ka jingkyrpad na ki paidbah ba bun balang ba ka sorkar Meghalaya lyngba ka Public Works Department (PWD) Road ba kim dei ban pynslem hynrei ki dei ban ïaleh katba lah ban pynbiang ne shna ha ka por kaba biang khnang ba ka jingdonkam bad jingkwah jong ki paidbah kan urlong.
Ha kaba ïa dei bad kane ka phang, ki nongñiah kali kiba ju pyndonkam ïa ka surok Mawphlang – Weiloi haba pynpaw ha u nongthoh khubor, ki la pynpaw ka jingkmen ban ïohi ba ïa kane ka surok la sdang ban pynheh kumba la mang da kaba shna da ka Intermediate Road hynrei ka suki palat ka jingpyntrei kumta ki la buh ka jingkyrpad ïa ka Public Works Department (PWD) Road ba ka dei ban ai jingbthah ïa ki nongpyntrei ba kin leh kham stet namar kumba ka long mynta haba ïaid na kane ka surok lada dei ha ka por tlang ka don ka jingpum-pum kaba la palat bad mynta lei ka lyiur ka la jan kumta ka um ktieh ka la ap lypa ïa ngi, ong ki nongñiah kali.
