Pynkup burom ka tnad Pulit ïa ka DS Tiehsaw ba kem ïa u runar ba pynïap ïa ka kurim ba dang armet

Nongstoiñ, Rymphang 21: Namar ka jinglah jong ki rangbah shnong Tiehsaw ban teh lakam bad pynjai jai ïa ki paitbah shnong, ba kin ym pynmynsaw ne shim ïa ka aiñ ha la ka kti wat hapdeng jong saw ka sian ka jingkhih bitar ka bym lah shuh ban batai, hadien ba ki la ïoh ban bat ïa u Biangkupar Nongsiej na ka shnong Lawse, uba la pynïap dusmon ïa ka kong (L) Wansaralin Wanñiang hapoh ïng kaba dei ka kurim jong u bad kaba dang armet, na ka liang ki pulit ka West Khasi Hills District ki la ai burom na ka bynta ka shnong baroh kawei.
Ki heh pulit dalade naduh u Superintendent of Police ki la ai ka jingïaroh shikatdei bad mynta ka janmiet sngi balang, ki la leit ban pynlong ïa ka jingïalang ha ïing dorbar jong katei ka shnong na ka bynta ban pynkup burom ïa ka dorbar bad ki paitbah shnong.
Ïa katei ka jingïalang pynkup burom la pynlong ha ïing dorbar jong katei ka shnong, ha kaba la pynïaid da u bah M.Dkhar sordar jong ka shnong, ha ryngkat ka jingïadon lang jong ki dkhot ka Executive Committee, ki riew rangbah shnong, kiba ha ïing ha sem jong ka kong (L) Wansaralin Wanñiang, ki volunteer jong ka shnong bad ki paitbah.
Na ka liang ka tnad pulit la don lang da u Bikram D.Marak uba dei u Superintendent of Police West Khasi Hills, u bah Hubert Kharkongor MPS Additional Superintendent of Police, u bah Steven Kharmyndai Officer Incharge ka Nongstoiñ Police Station, ka kong Wanñiang Officer Incharge Women Police kaba dei peit ïa ki Crime against women & children ryngkat ka team bad kiwei kiwei .
Ha shuwa ban pynkup burom bad ai ïa ka khusnam sha ka dorbar shnong, la ïoh ïa ka jingkren na u Dr P.Lyngkhoi Director barim ka tnad ka koit ka khiah, ha kaba u la ong ba ha ka por ba ki rangbah shnong ki la ïoh ban bat ïa u Biangkupar Nongsiej, ki paitbah jong ka shnong ki la ïoh jingtip ki la wan poi kynsan puk ryngkat ka jingbitar shla ka bym lah shuh ban ong ha ryngkat ka jingkhihwin kaba shyrkhei.
Hynrei, ki riew rangbah jong ka shnong, u kpa jong katei ka longkmie bad u sordar shnong kim shym la ailad bad ki la ïaleh katba lah ban tem bad pynjai jai ïa u paitbah, da kaba pynshai ba kim dei ban shim ïa ka aiñ hala ka kti, namar ka long ka bym dei.
U Bikram D.Marak Superintendent of Police West Khasi Hills, u la ai ka jingïaroh ïa ki rangbah jong ka shnong Tierhsaw bad u la ong ba ka jingleh jong kitei ki rangbah, ka long ka nuksa kaba bha tam ïa kiwei pat ki shnong hapoh ka jylla, namar bunsien haba kiba kum kitei ki jingshah leh dusmon ki jia khamtam eh haba ki paitabah ki ïoh bat ïa ki nongleh kam sniew, ki paitbah ki ju shim ïa ka aiñ ha la ka kti, da kaba ki bom ki tied haduh ba ki nongkleh kam sniew kin da khlad. Lada ki leh kumtei ki bor ka aiñ ki hap ban trei ïa la ka kam bad kiba jynjar ki dei hi ki nongïalam shnong.
U la ong ruh ba ka jingïatreilang jong ki rangbah bad ka dorbar shnong Tiehsaw, ka pyni ruh ba ka jingïatreilang jong ki bad ki pulit yn lah ban pynsajia ïa utei u Biangkupar Nongsiej ha ka rukom kaba dei. U la kyntu ruh ïa ki rangbah bad ki nong sakhi ba haba ka Ïingbishar ba don burom kan khot ban sakhi bad pynshisha ïa katei ka kam bymman ba shyrkhei ba u Biangkupar Nongsierj u la leh ïa la ka kurim, ki dei ban ïeng skhem bad ïathuh hok kumba ka la jia.
Na ka liang u Superintendent of Police u la aiti ïa ka syrnod sha u sordar kum ka dak jong ka jingpynkup burom.