Tang ha ki saw kynroh jong ka Balang kam pat biang, donkam ruh ban shakri ruh ha ka imlang ka sahlang: SELD

Shella, Jylliew 29 : Ka Rural Social Outreach (RSO), kaba dei ka kynhun treimon sngewbha jong ka Balang Presbyterian ka Shella Presbytery hapoh ka jingpeit jong ka Social Economic Life Development (SELD), ka la pynlong ïa ka Awareness Programme kaba kyrpang halor ka phang “Ban Ong Em Ïa U Drugs Bad Kiwei Ki Jingdih Ba Pynsniew” kum shibynta ban rakhe ïa ka International Day Against Drug Abuse & Illicit Trafficking ha kaba ïa kane ka prokram la pynlong ha Madan Ïalehkai Kynjatbol ha Sohlap, Shella, East Khasi Hills District.
Ka Rural Social Outreach jong ka Shella Presbytery ka la pynpaw ba kam sngewhun ban shakri tang hapoh ki saw kynroh jong ka Balang, hynrei ka don ha ka ïa ka jingangnud ruh ban trei na ka bynta ka bha ka miat ha ka imlang sahlang hi baroh kawei.
Kumta, ka thong jong kane ka prokram ka long ban ai jingtip, ban ai jingpynshai bad ban kyntu ïa ki samla bad ki paidbah ba kin kiar na u drugs, ka kyiad bad kiwei pat ki jingdih ba pynsniew kiba long ka daw jong ka jingpynjot pynpra ïa bun ki longïing, ki shnong bad ïa ka jaitbynriew hi baroh kawei.
Kiba la ai jingkren ki kynthup ïa u Bah John Tongwah, Officer In-charge ka Shella Police Station, uba la kren halor ka jingma jong u drugs bad ka jingdonkam ban ïatreilang ban pynduh jait ïa une u jaid jingdih, u Bah Neil Khongwir, Manager jong ka Manbha Foundation, Shillong, uba la ai ki jingsneng bad jingai mynsiem sha ki samla ba ki dei ban pynmlien ha ka lynti kaba bha ym ha ka lynti ka ban lam sha ka jingpynjot ïa ka lawei, bad kumjuh ruh u MDC Bah Barikupar Synrem bad u Wahadadar ka Shella Confederacy kiba la kyntu ïa ki paidbah ban don ka mynsiem jong ka jingïatylli bad ïalong kawei ha ka jingï pyrshah ïa u drugs.
Kum shibynta jong kane ka jingrakhe, la pynlong ruh ïa ka jingïalehkai kynjatbol paralok hapdeng ka Lawbah Sports Club bad ka Young Blood Sports Club, Sohlap. Ha kane ka jingïakhun, ka Lawbah Sports Club ka la jop da 2 – 0 kol.
Ha kane ka Awareness Programme, la pynïaid ïa ka jingïalang da u Rev. D.R. Youthborn, Treasurer jong ka RSO, ïa ka jingkren pdiang la ai da u Rev. P.D. Shangpliang, Secretary jong ka Social Economic Life Development (SELD) bad ïa ki kyntien khublei bad ka jingkyrkhu kyrdoh la ai da u T.Bn. G. Stone Hynniewta, Secretary jong ka RSO Shella Presbytery.