Tang 4 tylli ki kali rit shah ka shnong Thangraiñ ban wan ïalap Elekshon

0

Jowai, K’Lyngkot 31: Ka Executive Committee jong ka shnong Thangraiñ mynta ka sngi kala pynmih ïa ki kyndon kiba ïadei bad ka jingwan ïalap Elekshon jong ki kyrtong ki ban ïakhun ïa ka MLA 2023 sha poh ka shnong, ha kaba la bthah ïa baroh ki kyrtong ba ki hap ban bud beit bud ryntih ïa kine ki kyndon.
Ka shnong kala pyntip ba uno uno u kyrtong uba wan ïalap elekshon hapoh ka shnong um lah ban wan ïalam shibun tylli ki kali, hynrei la ai lad bad shah tang 4 tylli ki kali rit. Namar ka jingwan bun ki kali ka wanrah ki jingthut ha ka leit ka wan hapoh shnong poh thaw.
Ka shnong kala khang ruh ba yn ym shah ïa kino kino ki kyrtong ne ki nongkyrshan jong ki ba kin wanrah ïa kino kino ki jait jingdih pynbuaid, kum ka kyiad bad kiwei de.
Yn ym shah ruh ban sam pisa hapoh u pud u sam jong ka shnong. Lada lap ïa kino kino kiba ïaleh pyrshah yn pynshitom katkum ki kyndon aiñ.
La bthah ruh ba baroh ki jingïalang ki ban sa pynlong hapoh ka shnong Thangraiñ ki dei ban bud ryntih ïa ki kyndon jong ka Election Commission ka ri India bad ruh katkum ka shithi kaba la dep ban phah da u Deputy Commissioner sha baroh ki Waheh Shnong hapoh ka West Jaiñtia Hills District.
Na ka liang jong u Waheh Shnong ka Thangraiñ ma P. Sungoh, ula ong ba kane ka jingbuh kyndon ïa ka rukom ïalap elekshon, ka long ruh shi bynta ban bud beit bud ryntih ia ki jingbthah na ka Election Commission jong ka ri India, khnang ban ïoh ïa ka elekshon kaba khuid ba suba.

Leave A Reply

Your email address will not be published.