Haduh 145 ngut kiba ïoh jingsumar khmat ha Khimusniang naka WJHDAS&M Club

0

Jowai, K’Lyngkot 31 : Kawei na ki prokram ai jingsumar khmat ei ne ka ‘Free Eye Check up Camp’ ba la pynlong da u samla Sambor Surong uba dei ruh u President ka West Jaiñtia Hills District Adventure Sports and Mountaineering Club ha ryngkat ka jingïatreilang bad ka Mission Nethralaya Eye Care Center Shillong, ha Community Hall ka Dorbar Shnong Khimusniang Jowai.
Ha kane ka sngi baroh ki nongshong shnong kiba ka ïoh jingsumar khmat ei ki don haduh 145 kynthup lang ïa ki kynthei, ki shynrang bad ki hep kiba rit, la sdang ïa kane ka Medical Camp naduh ka por mynstep 9 baje mynstep tad haduh ka por janmiet.
Haba ïakren bad u samla Sambor Surong ula ïathuh ba ka jingthmu jong u ban pynlong ïa kane ka Free eye Check up Camp ka long kyrpang eh na ka bynta kiba duk ba kyrduh, kumjuh ruh shi bynta na ka jingdap lai snem jong ka Club naduh ba la seng ïa ka ha u snem 2020.
Ula pyntip kiba ïoh jingsumar khmat mynta ka sngi ki long kumne na ka bynta kito kiba don ïa ka BPL Card yn ai jingsumar ei khlem jingsiew, katba ïa kito ki bym don Card BPL kin hap shim kumba 30 present bad kane ka jingai jingsumar khmat kan dang ïaibteng ha kylleng ki jaka bad kumjuh ruh sha ki bynta ka East Jaiñtia Hills ong samla Surong.
Shuh shuh ula ong lyngba ka jingsynñiang jong ki katto katne kiba don shisha ka mynsiem ban ïatreilang na ka bynta ka bha ka miat, wat naduh kiba don na ka jylla Odisha bad Sikkim kila kloi ban ai jingïarap bad ban pynlong ïa kane ka ‘Free Eye Check up Camp’ kaba ïaid beit ïaid ryntih bad kane ka dei ka sein kaba ar hadien bala dep pynlong ha Umladkhur kaba hap hapoh ka Amlarem Sub Division.
Haduh mynta jong ka jingïaid lynti ula ïathuh ba ka Club kam shem la ïoh jingïarap ei ei na ka sorkar bad na ka liang jong u samla Surong ula hap ruh ban pynlut ïa ki katto katne ki jingdonkam na ka pla la jong, wat na ka liang jong ki nongmihkhmat hadien ba ula dep ban leit ud leit nam um shem la ïoh jingïarap eiei, da kaba kren diaw balei pat ïa ka jingïabam khana ki nongmihkhmat ki kloi ban ai jingïarap katba ïa ki kam ba bha ym don ba ai jingïarap, la buh jingkylli utei u samla.
Ula ïathuh ha ka por ba sdang ïa kane kam ka long kaba eh bha ïa u khamtam ha ka liang ka pisa pilaiñ hynrei dei da ka jingïarap u Blei la lah ban pynïaid shakhmat ïa kane ka kam ba bha jong ka Club.

Leave A Reply

Your email address will not be published.