Da ki jingbam tei met sam ka DTO Jaiñtia Hills sha ki 25 ngut ki nongpang TB

"Lah ban pynkoit ïa ka jingpang TB lada dih dawai tista, ong ka Dr. EBV Laloo

0

Jowai, K’Lyngkot 31: Ka ophis District Tuberculosis Officer, Jaiñtia Hills District, Jowai ha ryngkat ka jingkyrshan pisa jong ka Dalmia Bharat Foundation mynta ka sngi kila pynlong ïa ka prokram bad sam jingbam tei met sha kiba pang TB bad kumjuh ïa kito kiba la ïoh jingkoit na kane jingpang.
Baroh kiba ïoh jingïarap ki don haduh 50 ngut bad mynta ka sngi la sam shwa sha ki 25 ngut kiba dei napoh ka Thadlaskeiñ Block, West Jaiñtia Hills ha ka jingïalang ba la pynlong ka Ummulong CHC, la sam ïa kine ki jingbam teimet ba kynthup ïa u khaw, u dai, u Nutrela, u Piat, ka Umphniang bad Biscuit.
Kane ka prokram ka long ruh shi bynta ban pynsngewthuh shaphang ka National Tuberculosis Elimination Programme bad mynta la tip ïa ka kum ka Pradhan Mantri TB Mukt Bharat Abhiyan (PMTBMBA).
Ïa ka jingïalang la pynïaid da u District Programme Co-ordinator DTC ma Pynkhreh Bhalang Susngi, la ïoh ruh ka jingkren na u Dr. J. Rymbai i/c Ummulong CHC uba la batai shaphang kane ka prokram.
Katba ka Dr. E.B.V. Laloo, District Tuberculosis Officer, West Jaiñtia Hills District Jowai ha ka jingkren kala pynsngew baka sorkar kmie ka don ka thong ka rad dyngkhong ïa kane ka jingpang TB hapoh ka snem 2025 bad kane ka dei lyngba ka jingïatreilang jong baroh khamtam bad kito kiba pang TB ba kin wan shakhmat sha ki jaka sumar ba marjan khnang ban ïoh leh ïa kaba donkam namar ïa kane ka jingpang lah ban pynkoit kloi.
La ong ba ïa kane ka PMTBMBA la plie ha ka 9.9.2022 ha nongbah Delhi, ha kane ka prokram baroh ki nongshong shnong ka Ri ki lah ban ïadon bynta lang ban ïanoh synñiang la ka dei da ka pisa ne ki jingbam ban pynpoi sha kiba pang TB hapoh ka Ri.
Shuh shuh ka Dr Laloo, ka la ïathuh hapoh Jaiñtia Hills ki don ar tylli ki kharkhana pynmih dewbilat kita ka Star Cement bad ka Dalmia Cement kila long shisha ki nongkyrshan ba radbah halor kane ka kam ban pynbiang bam ïa ki nongpang TB.
Kala ïathuh ba kane ka jingpang ka lah ban ïabit na uwei u briew sha uwei pat, ka lah ruh ban pynïabit haduh 16 ngut shisnem lada ki nongpang kim dih dawai tista. ka ong ba ki dak ki shim kiba paw jong kane ka jingpang ki don saw bynta kita ki long ka jingjyrhoh kaba neh da ki taïew, ka jinghiar ha ka jingkhia, ka jingmih syep bad ka jingpang khieshoh.
Ka la kren shai ‘ba ïa kane ka jingpang TB lah ban pynkoit lada dih dawai tista’. Katba ïa ki kyntien ai khublei la ïoh na u Shkitdiam Pohsnem STLS Jowai TU.

Leave A Reply

Your email address will not be published.