Ban treikam pura ki kyndon Model Code of Conduct, la thaw ïa ka Ri Bhoi District Level Standing Committee
Nongpoh, Kyllalyngkot 31: Ban pynthikna ban nym don kano kano ka jingpynkheiñ ïa ki kyndon ka Model Code of Conduct bad ruh ban ïaid beit ïaid ryntih ka election hapoh Ri Bhoi District, na ka liang ki bor synshar District ka Ri Bhoi District bad ruh katkum ka Chapter -X Para 10.4.1 ka Handbook na ka bynta ki returning Officer 2019, ka ophis u District Election Officer ka Ri Bhoi mynta ka sngi u la thaw noh da kawei ka Committee ba la tip kum ka Ri Bhoi District Level Standing Committee.
Ïa kane ka Committee la khlieh da u Deputy Commissioner lane u District Election Officer kum u Chairman ka Committee ban ïalam ne peingor lyngba kane ka Committee halor ka jinglong jingman na ka bynta ka jingpynkhreh ïa ka election 2023 ban jied thymmai ïa kita ki Nongmihkhmat sha ka îing Dobar thaw aiñ ka jylla hapoh ka jylla Meghalaya.
Kumba la jied ïa u Deputy Commissioner ban long u Chairman ka Ri Bhoi District Level Standing Committee bad ha kane ka Committee la jied ruh ïa kiwei kiwei kum ki dkhot bad kynthup lang ïa ki nongmihkhmat na ki political party bapher bapher kiba don hapoh ka Ri Bhoi District.
Ki dkhot ba la shah jied kum ki member ka Committee ki kynthup ruh ïa u Additional District Election Officer, u Bah Rudolf Pde na ka party INC, u Bah B. Mawphniang na ka party BJP, u Bah Linus Lyngdoh na ka party NPP, u bah Pls Syiem na ka party UDP, u Bah G. Pyrtuh na ka party AITC, u Bah K. Marwein na ka party HSPDP bad ki deputy District election officer ki dei kiba peit ba khmih lang ïa kane ka Committee (Convener).
Kumba la pynpaw lyngba ka kyrwoh ba la phah da u District Election Officer sha ki lad Pathai Khubor, ka jingthmu ba la thaw ïa kane ka Ri Bhoi District Level Standing Committee, ka dei halor ka nongrim ban wan rah ïa ka jingïaid beit ïaid ryntih kane ka election jied nongmihkhmat jong u snem 2023 bad ruh ba lyngba kane ka Committee kin peit bniah bad peitngor ban nym don kano kano ka jingpynkhein ïa ki kyndon ka Model Code of Conduct kumba la dep ban pynjari da ka election commission ka ri India hapoh ka jylla Meghalaya.
Shuh shuh, lyngba kane ka Committee kan ïa shong pyrkhat ruh lada don kano kano ka kam ba pynkheiñ ïa ka model code of Conduct, kiba ïa dei bad ki electoral roll bad ki kyrteng ki Polling station bad ruh kiwei kiwei kiba ïa dei bad ki kam na ka bynta ka jingïaid beit ïaid ryntih kane ka election jied noh mihkhmat 2023 ha ka jylla kaba dei na Ri Bhoi District.