Takraiñ u Mukul ba phiel ka Sorkar MDA ban wanrah ïa ka Medical College ha Shillong bad Tura

0

Shillong, K’lyngkot, 25: U Nongïalam jong ka Liang Pyrshah ka Iingdorbar Thawaiñ ka Jylla u Mukul Sangma ha ka sngi Baar u la takraiñ tyngeh ïa ka Sorkar Sorkar Meghalaya Democratic Alliance (MDA) ba la ïalam da ka NPP ha kaba ïadei bad ka jingphiel ban pynurlong ïa ki ar tylli ki Medical College ha Shillong bad ha Tura.
“Mynta kaei kaba jia ka long hadien u snem 2018, ka Sorkar ka la duh noh ka jingbuh thong,” ong u Sangma ha ka jingïakren bad ki lad pathai khubor.
“Ha kaba ïadei bad ka Medical College ha Shillong hato kam dei mo ka jingshisha ba ngi ladep sdang ïa ka jingtei bad ïa ka building jong ka Reid Chest Hospital ha Mawdiangdiang. Kane ka dei kawei na ki jingsdang namarba ïa ka Reid Chest Hospital la thmu ban buh ha ka jaka ba don ka Shillong Medical College hynrei kaei kaba la jia mynta. Kane ka jingkylli ka long beit beit ïa kane ka Sorkar ba mynta,” u la ong.
U Sangma u la ong, haba pynshong nongrim katkum ka jingkyrpad jong ka Jylla, ka Sorkar India ka la kyrshan jingïarap pisa na ka bynta ban tei ïa ka Tura Medical College.
“Hynrei kaei kaba la jia? Ïa ka pisa kaba T.172 klur ladep ban pyllait hynrei kim shym la pyntreikam satia ïa kane ka pisa. Kane ka paw pyrthei hi ha ka jubab jong ki ha ka sien shong dorbar jong ka Iingdorbar Thawaiñ kaba ladep kaba ki la pynlut tang T.62 klur bad kaei kaba la jia ïa ka pisa kaba dang sah? Kane ka jingkylli ka long beit beit ïa kane hi ka sorkar ba mynta,” u la bynrap.
Haba pynpaw ba ka AITC ka la kut jingmut ban pynurlong ïa ki jingangnud bad ki jingphohsniew jong ki paidbah, u Sangma uba long ruh u Myntri Rangbah barim jong ka Jylla u la ong, “ka medical college kam dei tang na ka bynta ban ai jinghikai ha ka liang ka koit ka khiah, ka dei ka ruh ka shlem kaba pyntyllun ha kaba ïadei bad ka jingai jingsumar. Namarkata, mynta ki paidbah kim banse ban rah sumar ïa ki bahaing hasem ban ïoh jingsumar shabar ka jylla.”
“Kine ki dei ki mat kiba ïatakhuh bad ngi ki paidbah bad ha ka jingshisha ki paidbah ki la dei ban ïoh jingmyntoi ym tang haba ki phah pule ïa la ki jong ki khun ki kti lane ban ban pule ïa ka laiñ Medical hynrei kiba bun ki longiing ki ladei ban ïoh jingmyntoi ha ka jingai jingsumar kane ka Medical College,” la ong shuh shuh u Sangma.

Leave A Reply

Your email address will not be published.