Kular ka AITC ban thung ïa ka EC ban buddien ïa ka jingdawa ILP ha Jylla

Shillong, K’lyngkot, 25: Ka All India Trinamool Congress (AITC), kaba shong ha ka Liang Pyrshah jong ka Iingdorbar Thawaiñ ha ka sngi Baar ka la kular ban thaw da ka Expert Committee ban bishar sani bad ban pynurlong ïa ka jingdawa ban pyntreikam ïa ka Inner Line Permit (ILP) ha kane ka Jylla Meghalaya.
“Yn sa thaw ïa ka Expert Committee ban bishar bniah ïa ka jinglong jingman ba mynta da ka jingïasyllok bad ka jingïathir ïatai bad ki kynhun bapher bapher bad ki sengbhalang ha kaba ïadei bad ka jingdawa ban pynïoh ïa ka Inner Line Permit bad yn sa ïakren sani ruh kano ka lad kaba biang tam ka ban pynmyntoi ïa ki paidbah nongshong shnong,” la pynpaw ka AITC ha ka Election Manifesto ba la pyllait da u National General Secretary ka AITC u Abhishek Banerjee ha ka jingïalang kaba la long ha nongbah Shillong.
Haba kylli, u Abhishek u la ong, “ngin sa lum lang ïa baroh ki kynhun, ngin sa shim lang ïa ki jingai jingmut bad ïa ki jingsngew jong ki. Ngin sa don ka jingïathir ïatai bad uwei pa uwei u nongshong shnong jong ka jylla, bad hadien kane ngin sa poi sha ka wat ba khatduh bad ban leh ïa kaei kaba bha tam na ka bynta ka jingmyntoi jong ki paidbah nongshong shnong jong ka jylla.”
Ha ka 19 tarik, Nohprah, 2019, ka Iingdorbar Thawaiñ jong ka Jylla ka la mynjur ïa ka Resolution ban kyntu ïa ka Sorkar Pdeng ban pyntreikam noh mardor ïa ka ILP ha kane ka Jylla.
Ïa kane ka Resolution la kyrshan ruh da ka Liang Pyrshah. Hynrei haduh mynta kane ka kam ka dang sah pongding hapoh ka almari jong ka Ministry of Home Affairs ka Sorkar Pdeng.
U National General Secretary jong ka All India Trinamool Congress (AITC) u Abhishek Banerjee ha ka sngi Baar u la kynthoh kylla ïa ka BJP kaba la kynnoh ba ka Trinamool Congress ka dei ka party ‘Nongwei” bad buh jingkylli ruh hato u Mukul Sangma bad u Bah Charles Pyngrope ki dei ki nongwei.
Ha ka jingïakren bad ki lad pathai khubor u Abhishek u la ong ïa ka jylla Meghalaya yn synshar hi da ki paidbah ka Meghalaya bad kob ruh ïa ka BJP hato ka shlan neem ban leit sha West Bengal ban ong ba ïa ka Jylla West Bengal yn synshar hi da ki paidbah ka Bengal. Hato ki nud neem ki nongïalam jong ka BJP ban wan ha Meghalaya ban ong ba ïa ka jylla Meghalaya yn synshar hi da ki paidbah ka Meghalaya ym da kiba na Delhi lane na Guwahati. Hynrei ïa ka Jylla Meghalaya yn synshar hi da ki paidbah na rilum Garo, Khasi bad Jaiñtia.
“Lada ka BJP ka nud ban kren kumta ngan jin da la panmap da kaba pyndait baroh ar tylli ki kti,” ong u Abhishek.