Shillong, K’lyngkot, 25: U National General Secretary ka TMC u Abhishek Banerjee ha ka sngi Ba-ar u la ong ba lada ka party kan wan ha ka bor ha kane ka elekshon ka party kan pynthikna ba ki kam bamsap bad ki thurmur jong kane ka sorkar kaba mynta yn tohkit bniah bad ïa kiba don kti shisha yn pynshitom kat kum ki kyndon jong ka aiñ.
“Lada don mano mano ba la tuh noh ïa ka thong bad ka hok ki paidbah, ngin pynthikna ba ka baroh ki menbamsap yn pynshitom namar ki la tuh ïa ka jong u paidbah namar kane ngi angnud ban pylong ïa ka jylla kum ka Model State,” ong u Abhishek ha ka jingïakren bad ki nongthoh khubor.
Ha ka manifesto ka party ka la kynnoh ba kane ka sorkar kaba mynta ka la pheil ban pyni ïa ki jingtreikam kiba shai ban lait na ki jingkynnoh bamsap.
Ka TMC ka la kynnoh ba kane ka sorkar ka jingtrei kaba ka tbit ka long tang ha ka bamsap bam ngem ïa ka hok u paidbah ban kjit lut sha pla ki nongïalam.
Ka la kynnoh ba kane ka sorkar ka la shu kam ba ka leh bun ki kam hynrei ha ka jingshisha ka dei kaba la maitphang da ka sorkar barim bad kaba la dep wat ban mang tyngka ruh.
