Election Desk : Mano ban ïoh spong ha ka sngi ñiew vote na ka 17 North Shillong ?

Shillong 25, K’lyngkot : Phrasngi hadien ba ka Election Commission of India ka la dep ban pynbna sngi thep bad ñiew vote ha Meghalaya kata, ban thep ha ka 27 tarik Rymphang bad ban ñiew pat ha ka 02 tarik Lber mynta ka snem, ka jingïalap elekshon ka la sdang klang kum ka ding ba pur ha u ‘langïap. Ki political party ki ïaleh dohïap katba kot la ka bor ban pynjop ïa la ki jong ki kyrtong. Kat kumba long mynta, wat la ki dei ki synrop, ka UDP ka kynnoh ba ka NPP ka la knieh lut (hijacked) halade ïa ka burom jong ka jingjop jong ka sorkar Synrop MDA ha kane ka sansnem, ka lyer pyrshah sorkar kaba ki tip kum ka anti-incumbency wave ruh ka la sdang ban beh ha ki constituency ym tang para party synrop hynrei na ka liang pyrshah ruh. Kane ka dei ka bynta kaba itynnad bha ban peit, la ka Meghalaya ka lah ne em ban pynurlong shisha ïa kata kumba jia ha jylla Tamilnadu shisamoi da kawei shisamoi pat da kawei.
Ha ka 17 North Shillong Constituency, ki kyrtong kiba la paw kyrteng ban ïa aireng long; Bah Adelbert Nongrum VPP, Dr Aman War UDP, Bah John Anthony Lyngdoh (INC), Bah Ransom Sutnga NPP, Miss Elgiva Quinette Rynjah TMC, Bah Kyrsoibor Pyrtuh KAM katba na ka liang ka BJP pat (ï) ym pat lah ban tip haduh mynta, la ka ticket kan leit sha u Bah Michael Kharsyntiew ne Bah Marïahom Kharkrang namar kat haduh baphah ïa kane ka jingthoh sha Press, katei ka party kam pat lah ban rai ïano ban ai katba baroh arngut kitei ki kyrtong pat ki kam ba kin ïohbeit shalade. Hynrei, baroh ki kyrtong ki la ïarung ïing ha man la ki shnong hapoh katei ka Constituency. Haba sngap sha ki khubor na ki khun samla bad na ki rangbah ruh, ki pynmih kawei ka sur bad kata ka long “ban pynim biang ïa ka UDP ha katei ka Constituency” namar ba ka dei ka seng rilum ha kaba ka Mawkhar bad Jaïaw ka dei ka jabieng jong ka jylla ba la sdang ïa ka jingïakhih ban ïoh Hill State la ka jong. Katei ka mynsiem ka nangkyrsoi wat ha ki riewtymmen haba ki ïalap khana shaphang katei ka jingialeh Hill State. Ka jingrhem jong ka party APHLC ne ka All Party Hill Leaders Conference ha kitei ki snem jong ka jingïakhih ka long kaba ym lah ban batai, da ki hajar bad phew hajar ki volunteers ki mih shakhmat ban kyrshan ïa katei ka movement kaba sdang na Khasi National Durbar Hall.
Haba phai sha u Bah Dip, u kyrtong ka Congress utei ruh u don la ka jong ka jingpynksan, namar ba ha ka snem 2018 u la shah jop tang khyndiat vote, kata ruh na ka uniform BJP. Utei u rangbah u kam ba wat ha ka ktem jong ki non-tribal ruh ki dangjied ïa u hi wat ha kane ka kynti ruh namar ba u dei uba shait ïarap ïa ki ruh. U Bah Ranson Sutnga, kyrtong ka NPP u dei u kyrtong ba dang samla bad u dei ruh u technocrat uba la ïehnoh ïa ka kam Executive Engineer PWD namar ba u sngew ba ka don ka jingkhot ban shakri paidbah da ka lynti jong ka politics. Une u rangbah ruh, kum ka jingpynkhreh u la pyrshang ban sam ïa ki jingai isynei jong u sha man la ki shnong naduh ki bnai ba la dep ban pynpaw ïa ka mynsiem jingkwah shakri jong u bad u ïoh ruh ïa ka jingpynsleh na u Conrad Kongkal Sangma bad Bah Prestone Tynsong, ka jingïalap ban khring votes ka ïaid hynrei ym tip haduh katno ki paidbah kin shaniah. Nangta pat,I kong Elgiva Rynjah, Trinamool Congress idei iwei pat I samla ba don jingthrang ban pyni sha ki paidbah haduh katno ba I kwah ban shakri, I la phla ba I dei iwei na ki secretary barim jong ka seng Congress hynrei I la phet noh ryngkat bad u Dr Mukul Sangma, namar I ong ba ha ka Congress ym don lawei ba phyrnai shuh. I ong ba I kwah ban pynkhlaiñ ïa ka sur jong ki kynthei ba ka imlang ka sahlang kan phyrnai bad kan roi ryngkat bad ki khun samla kiba ym don ba lam lynti shano kin leit. I la rung ïing bad la I Kmie bad katto katne ki nongbud ban pynshisha ïa kata ka jingthrang jong I ban poi sha ka thong ban shakri hok ïa ka jaidbynriew. Kumjuh u Bah Michael Kharsyntiew u ’riew trei monsngewbha, uba la trei naduh ka por Lockdown2 ban sam jingïarap sha kito ki longïing ba duna ka jingïoh jingkot bad sha ki lanotkiba shah ktah ha ka khlam covid-19. Utei u rangbah ruh u kubur ba un ïoh ticket beit na ka BJP kumba u Bah Mariahom Kharkrang ruh u kam ban ïoh ticket.U Bah Kharkrang u dei u heh pulit uba la ïehnoh ïa ka kam sa khyndiat por ban shongthait,u kam ba u kwah ban shakri ïa ki paidbah, ïa ki khun samla ki bym donkam donjam bad uba la leh isynei ruh kumjuh ïa ki paidbah ha ka por Lockdown. Te namar ba ym pat tip mano ban ïoh ticket,te ka eh ban batai mano ba khlaiñ.
Nangta, haba phai sha u Bah Kyrsoibor Pyrtuh u kyrtong ka KAM, u dei u briew uba dang shu ïehnoh ïa ka kam sharai Balang bad u dei ruh u ’riew trei monsngewbha (social activist), te ym pat ïohsngew ïa ka khubor ïaid ïing hynrei kumba long lem kiwei, ma u ruh u don la ka nongrim lyngba jong ka Movement kumno ban pynsgewthuh ïa ki nongthepvote shaphang ka jingringswai ringsdot ka jylla na ka bamsap ka bamklop bad kiwei ki mat.
Haba phai pat sha u Bah Adelbert Nongrum sitting MLA uba dang shu resign dangshen ban rung sha ka VPP, ym lah ban len namar ba u dei u MLA jong kane ka samoi (2018-2023) u don hi la ka jong ka vote-bank. Ki samla ki dangieit hi ïa u,wat la u pynduh mynsiem ban nym ai
tika vaccination Covid ruh ha kato kap por. Hynrei, utei u rangbah u la kner shibun ki jingïarap sha ki paidbah lyngba ka scheme kyrpang ha ka por jong ka Khlam Covid-19. Nangta, katba kot la ka bor u la pyrshang ban pynïoh ïa ki scheme umbam umdih, ki madan football, ban pynbha ïa ki lynti synkien hapoh la ka Constituency. Une u rangbah u ïoh ruh ïa ka jingshaniah ha ki jaka ba sah ki non-tribal. Ka jingïakhun na ka VPP ka lah ban kyntiew ïa ka vote jong u wat la ki don ki kyntoit ba u hiar.
Haba phai pat sha u Dr Aman War kyrtong ka UDP, ki nongshongshnong jong ka Jaïaw Dorbar Pyllun lei ki sngewnguh sngewburom haduh katno ka jingtrei sngur mynsiem jong u Dr Aman War ryngkat I Kong Isawanda Laloo Deputy Commissioner barim ym tang ban tehlakam hynrei ban syngit syndon sbak ïa ka khlam COVID- 19 kaba la pynsuhjer ïa ki nongshongshnong. U Dr Aman u ai burom ïa ki Rangbahshnong bad ki Dorbarshnong ba lymda dei na ka jingtrei shitom jong ki ryngkat ryngkat, ka long kaba eh shisha ban tem ïa katei ka khlam kaba wanrah ka jingduhnoh da ki phewngut ki mynsiem briew tang hapoh katei ka DorbarPyllun wat la don katto katne ngut ki briew kiba theh umpjah ban leit ai injection. Ka jingïarap na ka liang jong u kum u DHS ha kata ka por ba hiran pyrthei khlam, ka long ban buh ïa ki Quarantine Centres ne ki Corona Care Centres hapoh ka Jaiaw Dorbar Pyllun lyngba ka Jaiaw Urban Health Centre ka la ïarap shibun ïa kiba pang ba shitom na katei ka khlam ban ïa kaba hap ban leit sah sha ki centres kiba kham jngai.Da katei ka jingtrei,la ïoh ban leit buh hospital tang ïa kito kiba kham shitom eh.
Utei u rangbah u ong ba um kwah ban kynthoh pyrshah ïa ki riewshimet hynrei tang kawei ka long ba lada ka BJP ryngkat bad ka jingïatrei kata ka Sangh Parivaar kum ka RSS bad kiwei kin pyrshang ban khanglad ïa ka jingmane Blei ba laitluid jong ki ritpaid Khristan ha India, un ïakhun pyrshah ban ïada ïa ka jingmane ba laitluid kat kum la kdew ha ka Fundamental Rights jong ka Constitution jong ka Ri India. U ong ha kine ki sngi wat la ka BJP ka pyrshang ban kup snieh langbrot hynrei ka dur ba shisha ka paw ha kiwei pat ki jylla ba ki pynshitom beiñ bad ki lehsang (desecrate) ïa ki jaka kyntang jong ka jingmane Blei bad u kdew ruh badangshen phi ïohi u SP ka Assam u leh kumno ban phah tohkit bniah halor ka jingtrei ki Balang bad ki kynhun Khristan ha katei ka jylla bad suki kan pur lada ngi ailad.
Da ka jingiarap jong u Bah Paul Lyngdoh sitting MDC jong ka Jaiaw,u Dr Aman u ïoh ïa ka jingshaniah na ki briew jong katei ka thaiñ khamtam ba u dei u officer uba la ihbha ha ka kam uba la songthait ruh kum u DHS(MI). U don ka jingkyrmen ban poi sha ka thong jong ka jingjop. Hynrei kumba long mynta, te ym pat nang ban ong mano ban jop namar baroh khoit ki kam ba kin jop beit. Ban ñiew ïa ki pliang ruh ha sor ka kham eh, namar sha kyndong, don kiba ong lada ñiew ïa ki pliang te la jop lypa, hynrei ha sor kam long kumta, sa tang ka por kan batai.