T. 80 shi kilo lah dor u krai, ap jingkyrmen ïa ka lawei ki nongrep Krai ha Meghalaya

Shillong, Lber, 28: Ka jingrep krai ha kane ka jylla Meghalaya ka dei kaba la jan duhjait bad dei ka North North East Slow Food & Agrobiodiversity Society (NESFAS) kaba la mait shrah ban pynim biang ban rep ïa u Krai ha ki katto katne ki shnong ha rilum Khasi bad Jaiñtia da ka jingïatreilang bad ki kynhun ïatreilang.
“Ha ki snem kiba mynshwa ngi ju rep bha ïa u Krai hynrei namarba bym don nong thied bad lada rep ruh shu sah kai kumto. Ynda ngi la iehnoh ïa ka kam rep krai ngi la rep bujli noh da u sying namarba u kham lah dor,” ong ka Kong Darapbiang Mulieh na ka shnong Khanduli, West Jaiñtia Hills District kaba la ïashim bynta ha ka Eat Right Millet Mela, kaba la long ha madan Malki, Shillong ha ka sngi Baar.
Ka Kong Mulieh ka la ïathuh ba bun na ki nongrep krai ha ka shnong Khanduli ki ju pyndonkam ban shet ja bad ban tylliat haduh ban da long powdar bad khleh lang bad ka umsyiad shwa ban bam. “Mynta pat ngi la ïoh jinghikai ban shna Cake, shna Pudding na u krai. Ngi la pyrshang ban shna ïa kine ki jingbam tangba ka jingeh ka long ba ngim don ïa ki tiar,” la ong ka Kong Mulieh bad bynrap, “ïa mynta ngi dang ïoh tang ka mashin ban shu pynkhuid ïa u skop.”
“Khathynñiew snem mynshwa ïa u krai ngi die ha ka dor T. 30 shi kilo hynrei mynta ngi la lah ban die ha ka dor T.80 shi kilo u bym pat pynkhuid ïa u skop,” ong ka Kong Mulieh.
Ka la ïathuh ba ka long bha kaba suk ban rep ïa u krai bad ong ruh ba ha ka shnong Khanduli ïa u krai la ju rep ha shiteng jong u bnai Jylliew.
Shuh shuh ka la ïathuh ba mynta u krai u ïaid iew bha namarba la bun kiba wad.
Ïa ka Eat Right Millet Mela, International Year of Millet 2023 kaba ar sngi la pynlong da ka Commissionerate of Food Safety, ka Sorkar Jylla ha kaba ka Myntri ka Rep ka Riang ka Dr. Mazel Ampareen Lyngdoh ka long kum ka Kongsan.
Haba kren kum ka Kongsan, ka Dr. Ampareen ka la pynpaw ïa ka jingsngewkmen ban sakhi ïa ka jingïashim bynta jong ki nongsengkam lajong bad ki nongrep krai na kylleng ka jylla kiba la ïasam jingtip halor ka rukom rep ïa u krai.
Ka la ai khublei ruh ïa ka United Nations na ka bynta ka jingai jingithuh bad ka jingpynim biang ïa ka jingrep krai. Ha Meghalaya ka jingrep krai ka dei kaba la slem bha.
Da ka jingshimkhia jong ka Sorkar, ka Dr. Ampareen Lyngdoh ka la pynpaw ïa ka jingkyrmen ba ki nongrep kin sa pynim biang ban rep ïa u krai uba long u mar rep uba lah dor bad uba long ruh u jingbam teimet uba ki briew ki ïabeh bha ban thied ha ki iew ki hat.
Ha kane ka Mela la sakhi lang da ka Commissioner of Food Safety ka Kong R.M Kurbah, ka Director jong ka tnat Agriculture ka Kong S. Kharsati, ka Assistant Commissioner of Food Safety, East Khasi Hills ka Kong D.B.S Mukhim, ka Director jong ka IIPH Shillong ka Dr. Sandra Albert bad kiwei kiwei.