Shillong, Lber 29 : U Myntri Rangbah ka Jylla Conrad K Sangma mynta ka sngi Ba-ar, ula pynbna ba ka Jylla kan ym lah ban kiar na ka jinghap pynlip bording namar ka jingduna ka bording hynrei u kular pat ba ka Sorkar kan pyrshang ban pynduna ïa ka por pynlip na ka bynta ka bit ka biang u paidbah.
U Conrad ula mynjur ba ka la kham biang ha ka liang ka jingpynmih bording mynta u snem namar ka Jylla kam pat mad ïa ka jinghap pynlip bording ha u bnai Rymphang bad Lber, ym kum ha kiwei kiwei ki snem. U Myntri Rangbah ula ainam ïa kane ka jingkham janai ha ka sienjam ban pynjanai ïa ka rukom treikam ka Tnad bording, kaba la shim da ka Sorkar ha kine ki arsnem bala leit noh.
Watla kala kham biang, hynrei ka dang don bun bah ka jingduna ha ka bording ïa kaba hap ban leh eiei. Namar kane, ka Sorkar kala hap ban pyntreikam ïa ka jingpynlip bording hynrei kan pyrshang ban pynduna ïa ka por kat ba lah na ka bynta ka bit ka biang u paidbah.
“Ngin pyrshang ban pynduna kat kaba lah. Ngin pyrshang ban leh ha kata ka rukom ba kano kano ka jaka kan nym shah pynlip bording bunsien ha ka shisngi” ula ong.
U Myntri Rangbah ula ban jur ba ka Sorkar kan peit thuh ruh ïa kiba bun ki nongrim haba pyntreikam ïa ka jingpynlip bording kum ka jinglong jingman ka suiñbneng, ka jingpynbeit ïa ka por bad kiwei kiwei.
