Bthah ka High Court ban wad jaka ka Sorkar Jylla ban tei ïa ka kad liengsuiñ thymmai

Shillong, Lber 28: Ka Meghalaya High Court ha ka sngi Ba-ar ka la bthah ïa ka sorkar jylla ba kan wad ki lad ki lynti ban ïoh da ki jaka kiba thymmai na bynta ban tei da ka kad liengsuiñ kaba thymmai ha ka jylla.
“Namar ka sorkar ka ong ba ka kwah ban don la ka jong ka kad liengsuiñ kaba la biang lut nadong shadong, ka sorkar da ka jingïasyllok lang bad ka Airport Authority of India (AAI) ne wat bad ki ophisar ba dei peit ïa ka Umroi Airport na bynta bad wad ki lad ki lynti ban wad da ki jaka kiba thymmai na bynta ban shna kad liengsuiñ. Ynda ka sorkar ka la ïoh ïa ka jaka kan lah ban khot ïa ka AAI ban pynpaw ïa ka jingsngew jong ki la kane ka jaka ba ka sorkar ka ïoh kan long ne em kaba biang ban shna ïa ka kad liengsuiñ ba thymmai,” ong ka Divison Bench jong ka High Court haba shong bishar ïa ka PIL ïa kane ka mat.
“Lada ka AAI ka lap ba ka jaka ba ka sorkar ka ïoh ka long kaba biang kan lah ban shimti ïa kata ka jaka da ka jingïabeit lang bad ki trai khyndew ka jingsiew bai lut ksan kan sdang bad ka sorkar ka dei ban husiar bha ïa kane ka mat khnang ba ki nongkhaïi kin ym ïohlad ban shim kabu ïa kane ka die ka thied khyndew namar tang shu ïohlad ma ki ka dor jong ka khyndew kan kiew da bun bun shah ban ïa kaba thied na ki trai,” la bynrap ka Bench.
Na ka liang ka Court ka la pynpaw ba lada ka sorkar jylla bad sorkar pdeng kam kwah ban wanrah kad liengsuiñ thymmai kam dei ka bynta jong ka ban pynbor ïa kane namar kam don ruh ka jingtbit ha kaba ïadei bad kane ka bynta.
Ka High Court ka la pynpaw ba na ka liang jong ka ka don tang kawei ka mat kaba ka kwah ba ka sorkar kan wad ki lad ki lynti ban tei noh da ka kad liengsuiñ kaba kham jan sha Nongbah Shillong namar ka kad lingsuiñ ha Guwahati ka la jngai palat.
Lah ban kdew ba ki liengsuiñ kiba kham heh kim lah satia ban hiar ha ka kad liengsuiñ kaba la don lupa ha Umroi namar ka jingrit palat jong ka.
Shuh shuh lah ban pynkynmaw ba na ka liang ka AAI ka pynpaw ba ka jingpynheh ïa ka kad liengsuiñ ha Umroi ka long kaba eh namar ka jinglut kan bun bha namar hap ban pom ïa u lum uba da ki spah spah meter na bynta ban pynheh ïa kane ka kad liengsuiñ ba ki liengsuiñ kiba heh kin lah ban hiar.