Ka la shitom shibun ban pynkhie im ïa ka MCCL tang da ka Sorkar : CM

0

Shillong, Lber 28 : U Myntri Rangbah, u Conrad K Sangma ha ka sngi ba ar, ula ong ba ka Sorkar kam shym la lah satia ban pynkhie im ïa ka Mawmluh Cherra Cement Limited (MCCL) watla kala dep ban kynshew bad pynlut palat 350 klur tyngka ka pisa.
Haba jubab ïa ka jingkylli ba la wanrah da u Bah Ardent Basaïawmoit ha ïingdorbar, u Conrad ula ong ba ha kine ki san snem bala leit, ka Sorkar kala theh biang sa 100 klur tyngka sha ka MCCL ba kan siew ïa ka tulop bad ki bainong jong ki Nongtrei.
Haba pynpaw ba ka Sorkar kam lah shuh ban ïai bteng ha kaban kynshew pisa ïa ka MCCL, u Myntri Rangbah ula ong ba na ka bynta ka bha ka miat jongki Nongtrei bad ka pla tyngka, ka Sorkar kala wad ïa baroh ki lad ki lynti ban leit da ka Joint Venture ha kaban pynïaid ïa kane ka karkhana shna dewbilat ha Mawmluh.
U Conrad ula pyntip ba ka Joint Venture Partnership ka dei kawei na ka lai tylli ka lynti ba ka Sorkar ka dang bishar. Ki artylli kiwei pat ka long ba ka Sorkar kan ïai bteng ban theh pisa ha ka Karkhana lane ban shu khang dam noh syndon ïa ka.
“Ki don satang kine ki lynti bad ngi la pyrshang ban wanrah da ka lynti kaba biang eh khnang ba kan nym kynton than ïa ka jingpynlut ka Sorkar ha kane ka karkhana” ula ong.
Shuwa kane, u Nongialam ka VPP bad MLA ka Nongkrem Bah Ardent M Basaiawmoit ula ong ba lada leit da ka Joint Venture kan buh ïa ka MCCL ha ka jingma kaba khraw. U la ai jingmut ruh ba kan bha shibun lada ka Sorkar ka shong pynïa nujor bad ka jingtreikam ki karkhana dewbilat kiba don ha Ri-lum Jaintia ha shuwa ban shim ïa ka rai ba khatduh ban leh ïaka Joint Venture.
U Symbud Myntri Rangbah ba khmih ia ka Tnad Commerce & Industries,u Bah Sniawbhalang Dhar ula pyntip ba ka Sorkar ka dang ap ïa ki kot ki sla ban sa aiti da ka Kompeni kaba trei pynmoh dewbilat ha Kolkata, kaba la pynpaw ïa ka jingkwah ban ïatreilang bad ka Sorkar lyngba ka Joint Venture.
“Ka jingbishar ka dang ïaid bad ngin sa shim ïa ka rai hadien ba ngi la bishar ïa ki kot ki sla jong kane ka Kompeni” ula ong.
U Symbud Myntri Rangbah ula kular ban sa shong bishar ia ka jingai jingmut ban shong nujor ia ka jingtreikam ka MCCL bad ki karkhana ha Ri-lum Jaintia.

Leave A Reply

Your email address will not be published.