Bym ai NoC thied jaka u Sordar Diengpasoh ïa ki Khasi pan jingshai ka HANM na ka KHADC

Shillong, Lber 28: Ka Hynñiewtrep A’chik National Movement (HANM) ha ka sngi ba-ar ka la leit ban pan jingshai na u Deputy Secretary ka Khasi Hills Autonomous District Council (KHADC) ban pan jingshai halor ka jingbym shah die jaka ne khyndew u Sordar Diengpasoh sha ki Khasi kiba ym dei na katei ka shnong namar la kheiñ ïa ki kum ki nongwei.
Haba kren sha ki lad pathai khubor u President ka seng u Bah Lamphrang Kharbani u la ïathuh ba ka seng ka pynpaw ïa ka jingbym sngew ïahap halor ka jingkheiñ nongwei da u sordar ka Diengpasoh wat ïa ki para doh ki para snam ha kaba ym shah satia ba kin thied jaka ha katei ka shong bad lada ki thied ruh na ka liang u Sordar um shym la ai kot ai sla satia.
“Ngi wan ban pynsngew halor kane ka mat hadien ba kiba bun ki paradoh parasnam kiba dei ki Khasi kiba sah ha kiwei pat ki shnong kum ha Mawlai, Laitumkhrah, Jaïaw bad kiwei ki jaka ki kwah ban thied jaka ne ki la dep thied ruh hynrei u Sordar ka Diengpasoh um shym la ai kot ai sla bad na ka liang jong ngi ngi wan pyntip bad pan jingshai na u Deputy Secretary ka KHADC halor kane ka mat,” u la ong.
U la ïathuh ruh ba kat kum ka jingtip ka seng na ka liang ka shnong ka la dep ban ai ka NoC na bynta ka Airport Authority of India.
“Kumno kat ïa ka kompeni kaba na shabar jylla ki ai kot ai sla bad ïa ki Khasi jong ngi pat ki kheiñ Nongwei bad na ka liang jong ngi te ngim lah ban pdiang ïa kane,” u la ong.
U la ïathuh ba ha kane ka jingïakynduh na ka liang u Deputy Secretary u la kular ba un shim khia ïa kane ka jingujor ka seng bad u la ïathuh ba ka seng kan sa leit ban ïakynduh bad ki nongïalam shnong ka Diengpasoh ha kaba ïadei bad kane ka bynta.