Pynlong jingïakhih ka Congress ba shah mait kyrteng u Rahul Gandhi kum u MP Lok Sabha
Shillong:Lber 28:Ka Meghalaya Pradesh Congress Committee (MPCC) ha ka sngi Ba-ar kaki la pynlong da ka jingïalang ha Congress Bhavan Shillong ban pynpaw ïa ka jingpyrshah halor ka jingshah mait kyrteng jong u Rahul Gandhi kum u dkhot jong ka ïingdorbar Lok Sabha.
Haba kren ha kane ka jingïalang u nongïalam jong ka Congress Legislature party (CLP), u Bah Ronnie V Lyngdoh, u la ong ruh ba ka jing shah mait kyrteng jong u Rahul Gandhi kum u MP sha Lok Sabha ka dei ka jing thombor ïa ka synshar paidbah, namar u dei u wei na ki nongïalam u ba kren barabor ïa bun tylli ki mat kiba ktah ïa ka imlang sahlang jong u paidbah ha ka ri hi baroh kawei bad ka jingthombor ka BJP ïa ka synshar paidbah ha ka ri.
U Bah Ronnie V Lyngdoh u la ong ruh ba ka Bharat Jodo Yatra ne ka jingïaid kjat naduh Kanyakumari shaduh Kashmir ha ka jingïalam jong u Rahul Gandhi ka la pyntieng pynsyier ïa ki nongïalam jong ka BJP bad ïa ka kynhun synrop National Democratic Alliance ( NDA) hi baroh kawei.
“Dei namar ba ka BJP ka ïohi ïa ka jingkyrshan kaba ki paidbah ki ai ïa ka Congress ha ka yatra ba la lam khmat da u rahul ba ki mait kyrteng noh ïa u khnang ban set kak ïa ka shyntur jong u,” u la ong.
Ha kane ka jingïalang ba lyngkot jong ka MPCC la ïadonlang ruh da ki MLA jong ka parti kata u bah Charles Marngar MLA ka Mawhati constituency,u Dr Celestine Lyngdoh MLA ka Umsning Constituency ,u Saleng A Sangma MLA ka Gambegre Constituency, u Bah Ronnie V Lyngdoh MLA ka Mylliem constituency nalor kiwei pat ki nongïalam jong ka Mahila Congress.
Lah ban kdew hangne ba u Rahul Gandhi u MP sha Lok Sabha na Wayanad, Kerela ha ka sngi Thohdieng u la shah mait kyrteng noh kum u MP shisngi hadien ba ka Kashari u Chief Judicial Magistrate (CJM), Surat ka la rai pynrem halor ki kam bymman ban ai ka saja da ka jingset phatok ba 2 snem halor ka jingkren ïalap elekshon jong u ha u snem 2019 ha kaba u la kam ba kiba bun ki nongtuh kiba paw ki dei kiba don ïa ka jait Modi kum u Nirav Modi, Lalit Modi, Narendra Modi.