903 tylli ki skul SSA ba don ki khynnah skul hapoh 20 ngut, 107 kiba tang hapoh 10 ngut
Don 1219 ki post ba thylli ha ki skul sorkar, 420 ha ki skul SSA
Shillong, Lber 28: U Myntri ka tnat Pule Puthi jong ka sorkar jylla u Rakkam A Sangma ha ka sngi Ba-ar u la ïathuh hapoh ka Ïing Dorbar Thaw Aiñ ba ki don haduh kumba 903 tylli ki skul SSA ha ka jylla kiba ka jingdon ki khynah skul baroh ka duna ïa ka 20 ngut.
U Myntri u la pyntip ruh ba ki don 45 tylli ki skul SSA ba dei jong ka Lower Primary kiba ka jingdon khynnah ka dei tang hapoh 10 ngut bad ki don haduh 62 tylli pat ki dei jong ki kyrdan Upper Primary bad u la ïathuh ruh ba ki don katto katne tylli ki skul ba ym don khynnah skul eiei ruh, ïa kane u Myntri u la ïathuh haba jubab ïa ka jingkylli u MLA ka Liang Pyrshah na Mawhati Constituency u Bah Charles Marngar.
U la ïathuh ruh ba na ka liang ka sorkar ka dang ïaid shakhmat ha kaban thung noh kum ki nonghikai ba pura.
Shuh shuh u la ïathuh ba ki don haduh kumba 1219 tylli psot nonghikai kiba thylli ha ki skul sorkar bad 420 ha ki skul SSA.
“Ki don kumba 1,219 tylli ki post kiba thylli ha ki skul sorkar ha kaba 1002 ki dei ha ki skul Lower Primary, 41 tylli ha ki Upper Primary, 125 tylli ha ki Secondary bad 51 tylli pat ha ki kyrdan Higher Secondary. Ha ki skul SSA ki don 420 ki post nonghikai kiba thylli ha kaba 102 tylli ka dei ha ki skul Lower Primary, 292 tylli ha ki skul Upper Primary bad 26 tylli pat jong ki skul secondary,” pyntip u Myntri.
U la ïathuh ba na ka liang ka sorkar ka la phah ïa 1002 ngut ki nonghikai shipor katbga ym pat lah ban pyndap da ki nonghikai ba pura.
U Rakkam u la ïathuh ba ka jingslem ban thung nonghikai ha kitei ki skul ka dei na ka daw ka jingbthah ka High Court ban pyntreikam ïa ka Roster ha ka jingthepkam ha baroh ki tnat sorkar.
“Na ka liang ka tnat ka la ïaid sha khmat ban thungkam ha kine ki skul bad ngi kyrmen ba ha kine ki khyndiat sngi ban wan kan urlong noh,” u la ong.